Samajwadi Party : महाराष्ट्रातील तिसरा पक्ष फुटणार? आमदार आमने-सामने; वादाचे कारण नेमके काय आहे?

शिवसेना, राष्ट्रवादी काँग्रेस या दोन पक्षांनंतर महाराष्ट्रात आता तिसरा पक्ष फुटीच्या उंबरठ्यावर आला आहे. 'समाजवादी' पक्षातील अंतर्गत वाद टोकाला गेला आहे. मागील काही दिवसांपासून आमदार अबू आझमी आणि आमदार रईस शेख यांच्यातील दरी वाढली आहे. दोघांमधील संबंध कमालीचे ताणले गेल्याचे सुत्रांचे म्हणणे आहे. अशात रईस शेख यांची काँग्रेस नेत्यांशी वाढलेली जवळीकही कार्यकर्त्यांसाठी चिंतादायक आहे.

महाराष्ट्रातील समाजवादी पक्षाचे अध्यक्ष आणि प्रमुख चेहरा म्हणून आमदार अबू असीम आझमी यांची ओळख आहे. तर आमदार रईस शेख हे पक्षातील आक्रमक शैलीसाठी ओळखले जातात. नुकत्याच झालेल्या अबू आझमी यांच्या वाढदिवस कार्यक्रमात हा तणाव स्पष्टपणे दिसून आला. मदनपुरा येथील पक्ष कार्यालयाच्या उद्घाटनासोबतच वाढदिवस सोहळ्याला रईस शेख गैरहजर राहिले.

या कार्यक्रमावेळी रईस शेख दुबईला असल्याचे सांगण्यात आले; पण कार्यक्रमाच्या काही दिवस आधीच रईस शेख यांनी कार्यकर्त्यांची बैठक घेऊन 'या कार्यक्रमाला उपस्थित राहू नका' असा सूचक संदेश दिल्याची माहिती मिळत आहे. दरम्यान, दोघांमधील अंतर्गत नाराजीविषयी बोलताना अबू आझमी यांनी ते नाराज असून नाराजी दूर करू असे आश्वासित केले आहे.

वादाचे कारण काय आहे?

या दोन्ही आमदारांमधील तणावाचे एक कारण म्हणजे वार्ड क्रमांक 211 म्हणजेच नागपाडा परिसर. 2017 मध्ये या वॉर्डमधून रईस शेख यांनी निवडणूक जिंकली होती. त्यामुळे हा परिसर आपल्याच प्रभावक्षेत्रात राहावा, अशी त्यांची अपेक्षा आहे. या ठिकाणी तिकीटवाटप त्यांच्या संमतीशिवाय होऊ नये, असा त्यांचा आग्रह आहे.

पण आझमी यांचे मत वेगळे असल्याचे दिसते. तिकीटवाटप हा पक्ष समितीचा अधिकार असून त्यात कोणीही वैयक्तिक हस्तक्षेप करू नये, याच भूमिकेवरून दोघांमध्ये वाद निर्माण झाल्याचे समजते. रईस शेख हे पक्षाचे अभ्यासू आमदार आहेत; मात्र ते आतापर्यंत जिथून जिंकून आले आहेत, तेथील सर्व उमेदवार ठरवण्याचा अधिकार त्यांना हवा आहे. कुठल्याही पक्षात असे चालत नाही, असे आझमी यांनी ठणकावून सांगितले आहे.

वाढती जवळीक चर्चेत :

राजकीय वर्तुळात रईस शेख यांची काँग्रेस आमदार अमीन पटेल आणि अस्लम शेख यांच्याशी वाढती जवळीक चर्चेचा मुद्दा बनली आहे. म्हणजे रईस शेख अनेकदा काँग्रेस नेत्यांच्या सहवासात दिसतात. यावर अबू आझमी यांनी अमीन पटेल आणि अस्लम शेख यांना काँग्रेस पक्षातच डावलले जात आहे, उलट त्यांनीच आमच्या पक्षात यावे, असे म्हणत त्यांनाच ऑफर दिली आहे.