Local Body Elections : चिन्ह वाटपाच्या काही तास आधीच ‘त्या’ नियमांत सुधारणा; निवडणूक आयोगाने काढला महत्वाचा आदेश...

Local body election symbol rules : राज्यातील नगरपंचायत व नगरपरिषदांच्या निवडणुकीचा प्रचार शिगेला पोहचला आहे. प्रामुख्याने राजकीय पक्षांच्या चिन्हावर निवडणूक लढविणाऱ्या उमेदवारांनी यात आघाडी घेतली आहे. पण स्थानिक आघाडी किंवा अपक्ष म्हणून निवडणूक लढणाऱ्या उमेदवारांना बुधवारी चिन्हांचे वाटप होणार आहे. त्याच्या काही तास आधीच राज्य निवडणूक आयोगाने महत्वाचा आदेश काढला आहे.

उमेदवारांना बुधवारी चिन्हाचे वाटप केल्यानंतर सर्वठिकाणच्या अंतिम उमेदवारांची यादी चिन्हासह प्रसिध्द केली जाणार आहे. अपक्ष उमेदवारांचे संपूण लक्ष सध्या चिन्ह वाटपाकडे लागले आहे. चिन्ह वाटप झाल्यानंतरच त्यांच्या प्रचाराला खऱ्या अर्थाने जोर येणार आहे. पण त्यांना प्रचारासाठी जेमतेम पाच दिवस मिळणार आहे.

काय केली सुधारणा?

आयोगाने मंगळवारी रात्री उशिरा चिन्ह वाटपाबाबतचा आदेश काढत तरतुदींमध्ये काही सुधारणा केल्या आहेत. या आदेशामध्ये म्हटले आहे की, सुधारित तरतुदींनुसार महापौर किंवा नगरपरिषद, नगरपंचायतीच्या अध्यक्षपदाच्या थेट निवडणूक होत असल्यास सुरूवातीला या उमेदवारांना प्राधान्याने चिन्ह वाटप केले जाईल. एखाद्या नोंदणीकृत अमान्यप३प्त राजकीय पक्षाच्या अध्यक्षपदाच्या उमेदवारास वाटप केलेले चिन्ह मुक्त चिन्हांपैकी असल्यास आणि तो उमेदवार त्याच नोंदणीकृत पक्षाकडून सदस्यपदाचाही निवडणूक लढवत असल्यास त्या उमेदवाराने त्याच मुक्त चिन्हाची मागणी केली असल्यास त्याला ते चिन्ह मिळेल.

एखाद्या नोंदणीकृत अमान्यताप्राप्त राजकीय पक्षाकडून अध्यक्षपदाची निवडणूक लढविणाऱ्या उमेदवारास वाटप करण्यात आलेले चिन्ह हे मुक्त चिन्हांपैकी असल्यास त्या मुक्त चिन्हाचे नोंदणीकृत अमान्यताप्राप्त राजकीय पक्षांच्या सदस्यपदांच्या उमेदवारांना त्यांच्या मागणीनुसार वाटप करण्यात येईल, असेही आयोगाच्या आदेशात स्पष्ट करण्यात आले आहे.

एखादा अपक्ष उमदवार अध्यक्षपदाच्या निवढणुकीसोबत सदस्यपदाचीही निवडणूक लढवत असल्यास त्या उमेदवारास अध्यक्षपदासाठी वाटप करण्यात आलेल्या मुक्त चिन्हाचे त्याच्या मागणीनुसार सदस्यपदासाठीही थेट वाटप करण्यात यईल. परंतू त्या उमेदवारास वाटप केलेल्या मुक्त चिन्हाचे सदस्यपदाच्या इतर कोणत्याही नोंदणीकृत अमान्यताप्राप्त राजकीय पक्ष किंवा अपक्ष उमेदवारास वाटप केले जाणार नाही, असे आयोगाने स्पष्ट केले आहे.

आधीची तरतूद काय होती?

चिन्ह वाटपाबाबत आधीच्या तरतुदीनुसार अध्यक्षपदासाठी थेट निवडणूक होत असल्यास सुरूवातीला या उमेदवारांना प्राधान्याने चिन्ह वाटप केले जाईल. त्यांना वाटप केलेली चिन्हे मुक्त चिन्हांपैकी असल्यास त्या मुक्त चिन्हांचे वाटप सदस्यपदाच्या इतर कोणत्याही उमेदवारांना केले जाणार नाही. परंतू, एखादा उमेदवार सदस्यपदाची निवडणूक लढवत असल्यास त्या उमेदवारास अध्यक्षपदासाठी वाटप करण्यात आलेले चिन्ह त्याने मागणी केल्यास, तो निवडणूक लढवत असलेल्या प्रभागातील सदस्यपदांकरितादेखील देण्यात येईल, अशी तरतूद आधीच्या आदेशामध्ये होती. आता त्यात काहीसा बदल करण्यात आला आहे.