Bulli Bai App : मास्टरमाईंडबाबत धक्कादायक खुलासा...असा झाला पर्दाफाश

मुंबई : सोशल मीडियात विविध मुद्यांवर विचार मांडणाऱ्या 100 प्रसिध्द मुस्लिम महिलांची Bulli Bai अॅपवरून बदनामी करण्याच्या षडयंत्राचा मुंबई पोलिसांनी (Mumbai Police) पर्दाफाश केला आहे. या षडयंत्राचा मास्टरमाईंड एक महिलाच असल्याने खळबळ उडाली आहे. या महिलेला पोलिसांनी उत्तराखंडमध्ये (Uttarakhand) अटक केली आहे. पोलिसांनी सोमवारी बेंगलुरू येथून तिच्या मित्राला अटक केली आहे.

Bulli Bai अॅप वर शंभर मुस्लिम महिलांचे फोटो टाकून त्यांची बदनामी केली जात होती. तसेच त्यांचा लिलावही करण्यात येत होता. या महिन्यांविषयी अत्यंत अभद्र टिपण्णी केली जात असल्याने शिवसेनेच्या खासदार प्रियांका चतुर्वेदी यांत्यासह अनेक राजकीय नेते व सामाजिक कार्यकर्त्यांनी याविरोधात तक्रार केली होती. अखेर मुंबई पोलिसांना या प्रकरणाचा छडा लावण्यात यश आले आहे.

पोलिसांनी सोमवारी बेगंलुरू येथून विशाल कुमार झा (Vishal kumar Jha) या अभियांत्रिकीचे शिक्षण घेणाऱ्या तरूणाला अटक केली होती. त्याच्याकडे अनेक तास चौकशी केल्यानंतर मास्टमाईंड असलेल्या महिलेची माहिती समोर आली. दोघांची ओळख सोशल मीडियाच्या माध्यमातूनच झाली होती. विशाल कुमारकडून महिलेची माहिती मिळाल्यानंतर मुंबई पोलिसांची एक टीम उत्तराखंडमध्ये दाखल झाली होती. तिथेच तिच्या मुसक्या आवळण्यात आल्या.

दोघेजण फेसबुक आणि इंस्टाग्रामसारख्या सोशल मीडियात एकमेकांचे मित्र असल्याने पोलिसांना त्यांचा शोध घेणे सोपे गेले. या धक्कादायक प्रकरणामध्ये मुख्य आरोपी असलेली महिला Bulli Bai App शी संबंधित तीन खाती चालवत होती. तर विशाल कुमारचे खालसा सुप्रिमिस्टच्या नावाने खाते होते. या षडयंत्रमागे शीख व्यक्ती असल्याचा गैरसमज पसरवण्यासाठी हे नाव दिल्याचे समोर आले आहे. विशाल कुमार याला आज न्यायालयात हजर केल्यानंतर 10 जानेवारीपर्यंत पोलीस कोठडी सुनावण्यात आली आहे.

Bulli Bai शी संबंधित सर्व माहिती ट्विटरवरून काढून टाकण्याचे आदेश दिल्ली पोलिसांनीही दिली आहे. तसेच पोलिसांनी ट्विटरकडे Bulli Bai शी संबंधित पहिले ट्विट केलेल्या व्यक्तीचा माहिती मागितली आहे. दिल्ली पोलिसांनी गिटहब (GITHUB) वरून Bulli Bai अॅप बनवणाऱ्या व्यक्तीचीही माहिती मागवली आहे. काही दिवसांपूर्वी Sulli Deals हे अॅपही बनवण्यात आले होते. त्यानंतर दुसरे अॅप आल्याने खळबळ उडाली होती.