'भारतीय जनता पक्षाला डिसेंबरमध्ये मोठे खिंडार'!

मुंबई : भारतीय जनता पक्षाचे महापालिकेतील वरिष्ठ नेते मनमानी कारभार करीत आहेत, त्यामुळे त्यांचे अनेक नगरसेवक नाराज आहेत. यातील अनेक जण फुटण्याची भीती असल्यानेच भाजप नेते शिवसेनेवर बिनबुडाचे आरोप करून त्यांचे लक्ष विचलित करण्याचा केविलवाणा प्रयत्न करीत आहेत, असा पलटवार शिवसेना नेते तथा स्थायी समितीचे अध्यक्ष यशवंत जाधव यांनी केला आहे. अनेक नगरसेवक शिवसेना नेत्यांच्या संपर्कात असून डिसेंबरमध्ये भाजपला खिंडार पडेल, असा दावाही जाधव यांनी केला आहे. (Many BJP corporators in touch with Shiv Sena leaders : Yashwant Jadhav's claim)

मुंबईतील सफाई कामगारांना ‘आश्रय’ योजनेतून घर देण्यासाठी शिवसेनेच्या माध्यमातून पाठपुरावा सुरू आहे. त्यामुळे शहरासह पूर्व आणि पश्चिम उपनगरात ३०० ते ६०० चौरस फुटांची हजारो घरे बांधली जाणार आहेत. याबाबतचे प्रस्ताव स्थायी समितीच्या बैठकीत मंजूरही झाले आहेत. विशेष म्हणजे स्थायी समितीत हे प्रस्ताव मांडले जात असताना भाजपचे नगरसेवक-नेते मूग गिळून गप्प का बसले होते, असा सवाल यशवंत जाधव यांनी केला आहे.

भाजपने ‘आश्रय’ योजनेत १८४४ कोटींचा भ्रष्टाचार झाल्याचा केलेला आरोप सिद्ध करून दाखवावा, असे आव्हानही शिवसेनेने दिले आहे. आपले नगरसेवक फुटू नयेत, यासाठी त्यांना वरिष्ठ नेत्यांकडून धमकावले जात असल्याचेही स्थायी समितीचे अध्यक्ष जाधव यांनी सांगितले.

शिवसेनेने न्याय दिला

सफाई कामगारांना कामाच्या ठिकाणापासून जवळ घर मिळावे, यासाठी गेल्या चार वर्षांपासून शिवसेनेच्या माध्यमातून पाठपुरावा सुरू आहे. अखेर हा प्रश्न आता मार्गी लागला आहे. यामध्ये मुंबई शहरात ११२१, पश्चिम उपनगरात १४९९ आणि पूर्व उपनगरात १३८६ अशी एकूण ४००६ घरे बांधली जाणार आहेत. याबाबतचे प्रस्ताव मंजूर झाले आहेत. त्यामुळे शिवसेनेनेच सफाई कामगारांना न्याय दिला असल्याचेही स्थायीचे अध्यक्ष यशवंत जाधव यांनी सांगितले.