Thackeray Brothers Reunion : 'लपवण्यासारखे काही नाही...'; ठाकरे बंधू एकत्र येणार? मनसे नेत्याकडून फोटो शेअर

Mumbai News: स्थानिक स्वराज संस्थांच्या निवडणुकीचे पडघम वाजू लागले आहेत. या निवडणुकीपूर्वी दोन्ही राष्ट्रवादी काँग्रेस एकत्र येतील ही आशा मावळली असतानाच दुसरीकडे ठाकरे बंधू एकत्र येणार की नाही, या चर्चेनं जोर धरला आहे. मतभेद बाजूला ठेवून महाराष्ट्राच्या हितासाठी ठाकरे बंधूंनी एकत्र येतील, असे संकेत सध्या मिळत आहेत.

महाराष्ट्र नवनिर्माण सेनेचे नेते संदीप देशपांडे यांनी फोटो शेअर करीत ठाकरे गट आणि मनसेने एकत्र येण्याच्या चर्चेला हवा तर दिली नाही ना,असा प्रश्न निर्माण झाला आहे. राजकारणात आक्रमक नेते, नेहमीच एकमेकांना भीडणारे नेते अशी मनसेचे नेते संदीप देशपांडे आणि ठाकरे गटाचे खासदार संजय राऊत यांची ओळख आहे.

राऊतांच्या टीकेचा सडेतोड उत्तर देणाऱ्या संदीप देशपांडे यांनी राऊतांचे 'नरकातला स्वर्ग'हे पुस्तक विकत घेतले आहे. सध्या ते पुस्तकाचे वाचन करीत आहे. त्याचा फोटो देशपांडेंनी सोशल मीडियावर शेअर केला आहे. 'लपवण्यासारखे काही नाही...' अशी कॅप्शन देत देशपांडेंनी ठाकरे बंधूंच्या एकत्र येण्यावर भाष्य न करताना गुढ संकेत दिले आहेत.

राऊतांचे पुस्तकांबाबत माध्यमांशी बोलताना देशपांडेंनी माध्यमासमोर स्पष्टीकरण दिले आहे."संजय राऊत यांचं नरकातला स्वर्ग हे पुस्तक मला भेट मिळालेलं नाही, विकत घेऊन वाचणं चांगलं असतं, म्हणजे चांगलं बोलण्याचं बंधन राहत नाहीत, मनातली खराखुरी भावना मांडू शकतो, मी संजय राऊत यांना पत्र लिहून सविस्तर अभिप्राय कळवणार आहे," असे देशपांडे यांनी स्पष्ट केले आहे.

शिवसेना उद्धव बाळासाहेब ठाकरे पक्ष आणि महाराष्ट्र नवनिर्माण सेनेच्या युतीबाबत ते म्हणाले की अद्याप युतीचा कुठलाही प्रस्ताव आलेला नाही. ज्या दिवशी कुठलाही ठोस प्रस्ताव येईल, त्या दिवशी राज ठाकरे निर्णय घेतील, ही स्पष्ट भूमिका आहे. 2014 आणि 2017 मध्ये जीभ पोळली आहे त्यामुळे ताकही फुंकून पिणार आहोत.