Mla Raju Patil News: जवळ आले नाही तर मारील...; मनसे आमदार राजू पाटील अधिकाऱ्यांवर भडकले

डोंबिवली : केंद्र सरकारच्या अमृत योजनेच्या माध्यमातून 'केडीएमसी'च्या 27 गावांत पाणी पुरवठा योजनेचे काम करण्यात येत आहे. या माध्यमातून पाण्याच्या टाकी उभारणीचे काम सुरू आहे. मात्र, ही कामे योग्य पद्धतीने होत नसल्याच्या तक्रारी कल्याण ग्रामीणचे आमदार राजू पाटील यांच्याकडे आल्या होत्या. त्यानंतर राजू पाटील यांनी मंगळवारी कामाची पाहणी करत काही त्रुटी आढळून आल्याने अधिकाऱ्यांना चांगलेच फैलावर घेतले.

या पाहणी दरम्यान, आमदार पाटील यांनी काम योग्य पद्धतीने सुरू आहे का?, असं अधिकाऱ्यांना विचारलं. यावेळी आमदारांनी अधिकाऱ्यांना जवळ बोलावताच ते न आल्याने आमदारांनी "काही करत नाही इकडे या पहा आणि मला सांगा" असं म्हणत अधिकाऱ्यांना बोलवलं.

यावेळी अधिकाऱ्यांची चांगलीच धांदल उडाली. त्यानंतर "इकडे नाही आलात तर मारील", असं म्हणताच अधिकाऱ्यांनी संबंधित कामाची तपासणी करण्यात येईल, असं आमदार पाटील यांना सांगितलं.

कल्याण ग्रामीण भागात पाण्याची टंचाई आहे. या भागातील पाणी पुरवठा सुरळीत होण्यासाठी या भागात केंद्र शासनाच्या अमृत योजनेतून काम करण्यात येत आहे. आता या योजनेच्या दुसऱ्या टप्प्यातील काम करण्यात येत आहे. पाण्याच्या टाक्या उभारण्याचे काम गावागावांत सुरू आहे. गेल्या 3 वर्षांपासून ही कामे सुरू असून काम लवकर होण्यासाठी आमदार पाटील हे पाठपुरावा करत आहेत.

पण काटई, भोपर येथे सुरू असलेले टाकी उभारण्याचे काम व्यवस्थित होत नसल्याची तक्रार आमदार राजू पाटील यांच्याकडे आली होती. तसेच भोपर येथे टाकीचे काम सुरू असताना टाकीचा काही भाग कोसळल्याचा व्हिडिओ सोशल मीडियावर व्हायरल झाला.

यानंतर आमदार पाटील यांनी आज काटई गावात जाऊन प्रत्यक्ष पहाणी केली. यावेळी त्यांना कामात अनेक त्रुटी आढळून आल्या. यावेळी अमृत जल योजनेचे प्रभारी कार्यकारी अभियंता शैलेश कुलकर्णी यांसह इतर साईड अभियंता श्रीकृष्ण उपस्थित होते.

यावेळी आमदार पाटील यांनी संबंधित अधिकाऱ्यांना हे काम योग्य पद्धतीने सुरू आहे का?, असं विचारलं. मात्र, विचारलेल्या प्रश्नांची उत्तरे अधिकाऱ्यांना देता येत नसल्याने आमदार भडकले. हे कशा पद्धतीने काम सुरू आहे.

अशा पद्धतीने आमच्याकडे चाळ पण बांधत नाही, तुम्ही तरी पाण्याच्या टाक्या बांधतायत?, असे खडे बोल आमदार पाटील यांनी सुनावले. यानंतर कामाच्या गुणवत्तेविषयी जबाबदार अधिकाऱ्याची लेखी तक्रार करून कारवाई करण्याची सूचना आमदारांनी अधिकाऱ्यांना दिल्या.

(Edited By- Ganesh Thombare)