MNS vs BJP : भेंडीबाजार, मोहम्मद अली रोडला जाऊन लोकांना मारुन दाखवा, नितेश राणेंच्या आव्हानाला संदीप देशपांडेंचं जोरदार प्रत्युत्तर

Mumbai News, 04 Jul : महाराष्ट्र नवनिर्माण सेनेच्या कार्यकर्त्यांनी अमराठी व्यापाऱ्याला मारहाण केल्याच्या घटनेवरून मुंबईसह राज्यातील राजकारण तापलं आहे. अशातच या मुद्द्याला हिंदुत्वाशी जोडत भाजप नेते नितेश राणे यांनी हिंदू धर्मियांना मारहाण करणाऱ्यांमध्ये दम असेल तर त्यांनी भेंडीबाजार, नळबाजार किंवा मोहम्मद अली रोडला जाऊन लोकांना मारुन दाखवावं, असं आव्हान मनसेला केलं होतं.

नितेश राणेंच्या या आव्हानाला मनसे नेते संदीप देशपांडे यांनी प्रत्युत्तर दिलं आहे. काटा चमचा चालवणाऱ्यांनी आम्हाला तलवार चालवायला शिकवू नये, अशा शब्दात त्यांनी राणेंवर पलटवार केला आहे. तसंच भाजप नेत्यांनी चड्डीत रहावे, असा इशाराही देशपांडे यांनी दिला आहे.

नितेश राणे नेमकं काय म्हणाले?

मिरा रोडमध्ये येथील परप्रांतीय व्यापाऱ्याला मारहाणी मुद्द्यावरून नितेश राणे यांनी मनसेवर टीका केली. ते म्हणाले, "हिंदू धर्मियांना मारहाण करणाऱ्यांमध्ये दम असेल तर त्यांनी मोहम्मद अली रोड आणि नळ बाजारात जाऊन आपली ताकद दाखवावी.

तिथेही मराठी भाषा ऐकायला येत नाही. तिथले दाढीवाले आणि गोल टोपीवाले मराठी बोलतात का? मनसे तिकडे जाऊन अशी हिंमत दाखवू शकेल का? आमचं सरकार हिंदुत्त्ववादी विचारांचं आहे. त्यामुळे आमच्या हिंदू बांधावांना मारणाऱ्यांवर कठोर कारवाई होईल."

संदीप देशपांडे काय म्हणाले?

तर राणेंनी मनेसेची हिंमत काढताच संदीप देशपांडे यांनी त्यांना जोरदार प्रत्युत्तर दिलं. देशपांडे म्हणाले, ज्या लोकांना मराठीतील 'श'चा उच्चार करता येत नाही, ते भाजपमधील नेते मीरा-भाईंदरमध्ये मोर्चा काढण्यासाठी फूस लावत आहेत. रजा अकादमीचा मोर्चा निघाला होता.

त्या वेळी त्यांच्या विरोधात मोर्चा काढण्याची हिंमत दाखवणारा महाराष्ट्र निर्माण सेना हा एकमेव पक्ष होता. तेव्हा सर्व भाजपचे नेते शेपट्या घालून बसले होते. मात्र मनसे मोर्चा काढून त्यांना सरळ भिडली. त्यामुळे काटा-चमचा चालवणाऱ्यांनी आम्हाला तलवारी कशा चालवायच्या, ते शिकवू नये, अशा शब्दात त्यांनी राणेंच्या टीकेला प्रत्युत्तर दिलं आहे.