Amit Thackeray: मुंबई पोलिस 'शिवतीर्था'वर 5 तास ताटकळले,पण अमित ठाकरेंनी नोटिशीला हातही लावला नाही; म्हणाले...

Mumbai News : नेरुळच्या छत्रपती शिवाजी महाराजांच्या पुतळ्याचं बेकायदेशीर अनावरण केल्याप्रकरणी महाराष्ट्र नवनिर्माण सेनेचे अध्यक्ष राज ठाकरे यांचे सुपुत्र अमित ठाकरेंवर गुन्हा दाखल करण्यात आला आहे. गुन्हा दाखल केल्यानंतर मुंबई पोलिस अमित ठाकरेंना (Amit Thackeray) नोटीस बजावण्यासाठी शिवतीर्थावर गेले होते. पण पोलिसांना तब्बल दीड तास प्रतीक्षा करावी लागल्याची माहिती समोर येत आहे.

मनसे नेते अमित ठाकरेंसह 70 जणांविरोधात गुन्हा दाखल करण्यात आला आहे. याबाबतची नोटीस देण्यासाठी नवी मुंबई पोलीस शिवतीर्थ या त्यांच्या निवासस्थानी पोहोचले होते. याबाबत अमित ठाकरेंनी भाष्य केलं. ते म्हणाले, तुम्ही त्रास का घेतला, मी स्वतः पोलीस स्टेशनला आलो असतो.

मात्र, राज ठाकरे (Raj Thackeray) यांचे सुपुत्र अमित ठाकरे यांनी नवी मुंबई पोलिसांची नोटीस स्वीकारली नाही.अखेर पाच तासानंतर नेरुळ पोलीस शिवतीर्थाहून पुन्हा नवी मुंबईच्या दिशेने निघाले. आता मनसेचे नेते अमित ठाकरे हे येत्या रविवारी(ता.23) नेरुळ पोलीस स्थानकात स्वतः दाखल होणार असल्याची माहिती समोर येत आहे.

अमित ठाकरेंवर पहिला राजकीय गुन्हा

छत्रपती शिवाजी महाराज यांचा पुतळा नवी मुंबईतील नेरुळ इथं चार महिन्यांपासून झाकून ठेवला होता. झाकून ठेवलेल्या या पुतळ्याचे मनविसेचे अमित ठाकरे यांनी रविवारी कोणतीही परवानगी न घेता अनावरण केलं. याप्रकरणी नवी मुंबई पोलिसांनी अमित ठाकरे यांच्यासह 70 मनसे कार्यकर्त्यांवर गुन्हा दाखल केला आहे. अमित ठाकरे यांच्याविरोधात दाखल झालेला हा पहिला राजकीय गुन्हा आहे.

शर्मिला ठाकरे काय म्हणाल्या..?

अमित ठाकरेंवर दाखल करण्यात आलेल्या गुन्ह्याबाबत मला अभिमान असल्याचं शर्मिला ठाकरे म्हणाल्या,यावेळी त्यांनी मी पण वाट बघते माझ्यावर कधी केस होते, अशी खोचक प्रतिक्रियाही दिली. यांना निवडणुकीसाठी फक्त महाराज पाहिजे, किल्ल्यावर हे नमो सेंटर उभारणार आहेत. किल्ले हायजॅक करण्याचा प्रयत्न आहेत. पण, आम्ही होऊ देणार नाही. निवडणुकीसाठी यांना केवळ महाराज दिसतात. पंतप्रधान तिथं येऊन गेले, पण त्यांना वेळ शिवरायांच्या पुतळ्याच्या लोकार्पणासाठी वेळ मिळाला नसेल, अशा शब्दांत त्यांनी सत्ताधारी पक्षावर निशाणा साधला.