राणेंनी सरकार पडण्याचा मूहूर्त सांगताच मलिकांनी कोंबड्यांचा विषय काढला..

मुंबई : राज्यात महाविकास आघाडी सरकार (Mahavikas Aghadi Government) स्थापन झाले तेंव्हापासूनच विरोधी पक्ष भाजपकडून सातत्याने सरकार पडण्याबाबत अनेकदा भविष्यवाणी करण्यात येत आहे. भाजप नेत्यांच्या या वक्तव्याचा राष्ट्रवादीचे नेते व अल्पसंख्याक मंत्री नवाब मलिक (Nawab Malik) यांनी चांगलाच समाचार घेतला आहे.

नवाब मलिक म्हणाले, बोकड, कोंबड्या ठेवून आणि नवसाने सरकार पडत नाही किंवा बनत नाही. सुरुवातीला भविष्यवाणीने सरकार पाडत होते. आता नवसाने पाडण्याचा प्रयत्न होतोय. मात्र, या भ्रमात राहू नये, असा खोचक व सबुरीचा सल्ला त्यांनी भाजपला माध्यमांशी बोलतांना दिला आहे.

काही लोकांकडे २३ वर्षात नवसाच्या इतक्या कोंबड्या जमल्या की आता 'त्या' कोंबड्यांसाठी सरकार बनवण्याचे भाकीत करावेच लागतेय, अशा आशयाचे ट्वीट करत नवाब मलिक यांनी भाजप नेत्यांच्या मनसुब्यावर जोरदार टीका केली. त्यानंतर माध्यमांशी बोलताना ते म्हणाले की देवेंद्र फडणवीस हे सरकार जास्त काळ टिकणार नाही. अशी भविष्यवाणी करुन थकले. शेवटी त्यांची भविष्यवाणी खरी होईना म्हटल्यावर चंद्रकांत पाटील झोपेतून जागे झाले आणि सरकार जाण्याच्या घोषणा करू लागले. मात्र, आता तो मोर्चा नारायण राणे यांनी सांभाळला आहे.

२३ वर्षापूर्वी नारायण राणे मुख्यमंत्री होते. त्या काळापासून नवसाचे बोकड आणि कोंबड्या दाखवल्या जात आहेत आणि आता त्या कोंबड्या व बोकडासाठी सरकार बनवण्याचे भाकीत करावे लागतेय असा उपरोधक टोला त्यांनी राणेंना लगावला.

मलिक म्हणाले आमचे आघाडी सरकार खंबीर आहे आणि ते पाच वर्ष पूर्ण करेल. याअगोदर मुख्यमंत्री उद्धव ठाकरे यांनी पाच वर्षांसाठी सरकार बनवले नाही तर, २५ वर्षासाठी टिकेल, असे जाहीर केल्याची आठवणही त्यांनी भाजपला करुन दिली. याबरोबरच भाजपचे जुने नेते आता थकले आहेत. आता नवीन खेळाडूंना जबाबदारी दिली आहे. ते बोलतील परंतु त्याने सरकार जात नाही, असा टोलाही मलिकांनी लगावला आहे.