Prakash Ambedkar News : प्रकाश आंबेडकरांना निवडणुकीत राहावे लागणार ‘वंचित’? 4 महिन्यांपासून हात पुढे, पण...

Vanchit Bahujan Aghadi Still Without Allies : स्थानिक स्वराज्य संस्थेच्या निवडणुकीत महाविकास आघाडीसह महायुतीमध्ये जोरदार रस्सीखेच असणार आहे. पण या निवडणुका स्वबळावर लढायच्या की युती-आघाडीसह याबाबत अद्याप अजून कोणत्याच पक्षामध्ये एकमत झालेले दिसत नाही. सर्वच पक्षांनी स्थानिक पातळीवरील नेत्यांवर ही जबाबदारी टाकल्याचे चित्र आहे. दुसरीकडे वंचित बहुजन आघाडीची साथ कोणत्याही पक्षाला नको असल्याचे चित्र आहे.

‘वंचित’चे प्रमुख प्रकाश आंबेडकर यांनी सोशल मीडियात याबाबत पोस्ट केली आहे. त्यांनी पोस्टमध्ये म्हटले आहे की, स्थानिक स्वराज्य संस्थेच्या निवडणुकीत भाजप आणि त्याचे मित्रपक्ष सोडून इतर पक्षांसोबत युती करायला आम्ही तयार आहोत! हे मी 21 मे रोजी सांगितले होते आणि माझी पत्नी अंजली आंबेडकर यांनी सुद्धा 18 जून रोजी तेच सांगितले होते.

आजपर्यंत काँग्रेस किंवा इतर कोणत्याही पक्षाने वंचित बहुजन आघाडीशी युतीसाठी संपर्क साधलेला नाही, अशी माहितीही आंबेडकरांनी पोस्टमध्ये दिली आहे. भाजपने काँग्रेसला वंचित बहुजन आघाडीशी युती करू नये, असे सांगितले आहे का? भाजपकडे काँग्रेसविषयी असं काय आहे, ज्यामुळे काँग्रेस भाजपला घाबरत आहे?, असा सवाही आंबेडकरांनी केला आहे.

आंबेडकर यांनी चार महिन्यांपूर्वी म्हटले होते की, स्थानिक स्वराज्य संस्थांच्या निवडणुका आम्ही लढवणार आहोत. स्थानिक पातळीवर युतीचे अधिकार जिल्हा कमिटीला देण्यात आले आहेत. जिल्ह्यात भाजपला सोडून युती करण्यास हरकत नाही. याबाबत महाराष्ट्र कमिटी निर्णय घेईल, असे आंबेडकरांनी त्यावेळी स्पष्ट केले होते.

दरम्यान, मागील वर्षी पार पडलेल्या लोकसभा निवडणुकीदरम्यानही वंचित आणि महाविकास आघाडीमध्ये बोलणी सुरू झाली होती. पण अखेरच्या क्षणी बोलणी फिस्कटली. विधानसभेतही आघाडी होऊ शकली नाही. आता आंबेडकरांनी पुन्हा एकदा स्थानिक स्वराज्य संस्थेच्या निवडणुकीत आघाडीसाठी हात पुढे केला आहे.

महाविकास आघाडीतून कुणीही अद्याप आंबेडकरांना प्रतिसाद दिलेला नाही. महाविकास आघाडीतील काँग्रेस, राष्ट्रवादी काँग्रेस शरदचंद्र पवार पक्ष आणि शिवसेना उद्धव बाळासाहेब ठाकरे पक्षामध्येच आघाडी फिस्कटण्याची शक्यता आहे. त्यामुळे ‘वंचित’ला स्थानिकच्या निवडणुकीतही आघाडीपासून ‘वंचित’ राहावे लागू शकते.