"एवढे द्या, मी पोलिस स्टेशनमध्येच जामीन देतो" : PSI रंगेहाथ लाचलुचपच्या जाळ्यात

मुंबई : लाचलुचपच प्रतिबंधक विभागाने मुंबईत (Mumbai Police) पोलिस उपनिरीक्षकाला (PSI) लाच घेताना रंगेहाथ अटक केली आहे. विकास लोखंडे (Vikas Lokhande) असे या उपनिरीक्षकांचे नाव आहे. पोलिस स्टेशनमध्येच जामीन मिळवून देतो असा दावा करत लोखंडेने लाचेची मागणी केली होती. अंधेरीच्या एमआयडीसी (Andheri MIDC) पोलिस ठाण्यात ही कारवाई करण्यात आली आहे. याप्रकणी गुन्हा दाखल करण्यात आला असून लाचलुचपत विभाग (ACB) पुढील तपास करत आहे.

याबाबत अधिक माहिती अशी की, अंधेरीच्या एमआयडीसी पोलिस ठाण्यात विकास लोखंडे हे पोलिस उपनिरीक्षक म्हणून कार्यरत होते. लोखंडे यांनी दोन दिवसांपूर्वी एका आरोपीवर गुन्हा दाखल केला होता. आरोपीच्या नातेवाईकाचे जामीनासाठी प्रयत्न चालू होते. यावेळी संबंधित आरोपीला कोर्टात हजर न करता पोलिस ठाण्यातच जामीन देतो, असे सांगून २० हजारांची लाच मागितली होती. मात्र तडजोडी अंती १० हजार रुपये लाच देण्याचे ठरले.

मात्र आरोपीच्या नातेवाईकाला लाच देण्याची इच्छा नसल्याने संबंधितांनी लाच लुचपत प्रतिबंधक विभागात उपनिरीक्षक लोखंडे यांच्याविरुद्ध तक्रार दाखल केली. या तक्रारीनुसार लाचलुचपत काल विभागाने सापळा रचला. त्यानुसार लोखंडे यांना १० हजार रुपयांची लाच स्विकारताना रंगेहाथ ताब्यात घेण्यात आले. याप्रकणी लोखंडेवर गुन्हा दाखल करण्यात आला असून लाचलुचपच विभाग पुढील तपास करत आहे.