Raj Thackeray: "बॉसला मारा, एक मत त्याच्या गालावर द्या पण..."; राज ठाकरेंचं अजब आवाहन

Raj Thackeray: महाराष्ट्र नवनिर्माण सेनेच्यावतीनं ईव्हीएमविरोधात १ नोव्हेंबर रोजी मुंबईत मोर्चा काढण्यात येणार आहे. या मोर्चाला सर्वांनी हजर राहावं असं आवाहन राज ठाकरे यांनी आज एका जाहीर सभेत केलं. हे आवाहन करताना त्यांनी एक अजब विधानही केलं. जर तुम्ही कामावर असाल आणि तुमच्या बॉसनं सोडायला नकार दिला तर बॉसला मारा, शनिवारच्या मोर्चासाठी त्याच्या गालावर एक मत द्या, असं त्यांनी म्हटलं आहे.

राज ठाकरे म्हणाले, मी तुम्हाला खास करुन माझ्या महाराष्ट्र सैनिकांना तसंच न्यूज चॅनेलचे सर्व प्रतिनिधींच्या मार्फत मी महाराष्ट्रातील माझ्या सर्व मतदारांना, माझ्या महाराष्ट्र सैनिकांना आणि सर्वांनाच सांगतोय की या मोर्चात सामील व्हा. महाराष्ट्रात काय प्रकारचा राग आहे हे या मोर्चामधून तुम्ही दाखवा. तो व्यक्त करण्यासाठी तुम्हाला सर्वांना तिकडे यावं लागेल. तुम्हाला सर्वांना यावं लागेल. आज नोकरी होती बॉस नाही सांगितलं तर बॉसला मारा...शनिवारपुरतं एक मत त्याच्या गालावर द्या. पण मला वाटतं तुमचा बॉस पण मतदार असेल मग त्यालाही घेऊन या.

दरम्यान, मुंबईतल्या रंगशारदा सभागृहात झालेल्या या सभेत राज ठाकरे यांनी चौफेर फटकेबाजी केली. उद्धव ठाकरे आणि मी आता रोजच भेटणार आहोत, अशा शब्दांत त्यांनी सत्ताधाऱ्यांना आणि माध्यमांच्या प्रतिनिधींना टोला लगावला. तसंच यावेळी त्यांनी ईव्हीएम मशिनवर मतदान का घेऊ नये? यासाठी एका प्रतिरुप ईव्हीएम आणि व्हीव्हीपॅट मशिनचा आणि त्याच मतचोरीसाठी कशा प्रकारे प्रोग्रामिंग केलं जातं, याचं प्रात्यक्षिकच दाखवलं. याचे निकाल खरोखरच धक्कादायक दिसून आले. यामध्ये केळं, सफरचंद आणि कलिंगड नामक उमेदवारांचा मतदानाचा डेमो दाखवताना केळ्याला मतदान केल्यानंतर ते सफरचंदाला जात असल्याचं दिसून आलं.