‘कृष्णकुंज’ सोडण्याचा राज ठाकरेंचा निर्णय

मुंबई : ‘कृष्णकुंज’ म्हटलं की राज ठाकरे आणि राज ठाकरे म्हटलं की ‘कृष्णकुंज’... हे आपोआप ओटावर येते. दादरमधील शिवाजी पार्कच्या शेजारी राज यांचे हे निवासस्थान आहे. पण, आता महाराष्ट्र नवनिर्माण सेनेचे प्रमुख राज ठाकरे हे कृष्णकुंज हे निवासस्थान सोडून नव्या घरात प्रवेश करणार आहेत. दिवाळी पाडवा किंवा भाऊबीजेच्या मुहूर्तावर राज ठाकरे आणि कुटुंंबीय नव्या घरात प्रवेश करणार असल्याचे सांगितले जात आहे. (Raj Thackeray will enter the new house on the occasion of Diwali Padva)

राज ठाकरे यांचा बालपणापासून मनसे अध्यक्षपदापर्यंतचा प्रवास मुंबईतील दादरच्या शिवाजी पार्कला लागून असलेल्या ‘कृष्णकुंज’ने पाहिला आहे. राज यांना भेटण्यासाठी अनेक मोठ्या हस्ती या थेट ‘कृष्णकुंज’वर येत असत. पण, मनसे प्रमुख आता नव्या घरात राहायला जाणार आहेत. ही पाच मजली इमारतही शिवाजी पार्कला लागूनच असून सध्याच्या कृष्णकुंज या निवासस्थानाच्या शेजारीच आहे. बड्या नेत्यांसह राज्यातील मनसे कार्यकर्त्यांचा राबता हा कायम ‘कृष्णकुंज’वर असतो. आता तो नव्या घरीही राहणार आहे. त्यामुळे ‘कृष्णकुंज’ याप्रमाणेच नव्या घराचीही ओळख निर्माण होणार आहे.

दरम्यान, कृष्णकुंज या निवासस्थानाशेजारीच असलेल्या राज ठाकरे यांच्या या नव्या पाच मजली इमारतीचे नाव काय असणार आहे, याची उत्सुकता आता महाराष्ट्र नवनिर्माण सेनेच्या कार्यकर्त्यांसह राज्यातील राजप्रेमींना लागली आहे. दिवाळी पाडव्याच्या मुहूर्तावर राज ठाकरे आणि त्यांचे कुटुंबीय नव्या घरात प्रवेश करणार आहेत, अशी माहिती सांगण्यात येत आहे.

नव्या इमारतीत मनसेच्या मुख्य कार्यालयासह ग्रंथालयही

व्यंग्यचित्र काढणे हा राज ठाकरे यांचा छंद आहे. वाचन करणेही त्यांना आवडते, त्यामुळे राज यांच्या नव्या इमारतीमध्ये एक मोठे ग्रंथालयही असणार आहे. या इमारतीच्या पहिल्या मजल्यावर समिती कक्ष असणार आहे. विशेष म्हणजे महाराष्ट्र नवनिर्माण सेनेचे मुख्य कार्यालयही याच इमारतीमध्ये असणार आहे. त्यामुळे ‘कृष्णकुंज’प्रमाणेच नवे घरही अगदी पहिल्या दिवसापासून कार्यकर्त्यांनी गजबजून जाणार, यात कोणतीही शंका नाही.