मशिदींवरील भोंगे उतरवण्यासाठी पुढे याल तर खबरदार; रामदास आठवलेंचा इशारा

मुंबई : मशिदींवरील भोंगे कोणी जबरदस्तीने उतरवण्यासाठी पुढे येतील तर त्यांना रोखण्यासाठी रिपब्लिकन पक्षाचे भीमसैनिक पुढे उभे राहतील. संविधानाचे (Constitution) राज्य असून इथे कुणाची मनमानी आम्ही चालू देणार नाही, असा इशारा रिपब्लिकन पक्षाचे (RPI) राष्ट्रीय अध्यक्ष केंद्रीय सामाजिक न्याय राज्यमंत्री रामदास आठवले (Ramdas Athavale) यांनी दिला.

ईदमुळे ३ मे रोजी भोंग्यांना हात लावणार नाही, परंतु ४ मे रोजी ते काढणार, असा इशारा राज ठाकरे (Raj Thackeray) यांनी दिला आहे. राज यांची ही भूमिका संविधानविरोधी आहे. रिपब्लिकन पक्ष मशिदींवरील भोंग्यांचे संरक्षण करेल. पोलिसांनी सुद्धा रिपब्लिकन कार्यकर्त्यांना सहकार्य करावे, असे आवाहन आठवले यांनी केले आहे. मुस्लिम समाजातील व्यक्तींनीही संयम पाळावा. आक्रमक उत्तर देऊन अधिक तेढ निर्माण होईल, अशी भूमिका कोणीही घेऊ नये. समाजात शांतता-बंधुता-सौहार्द टिकवण्यासाठी रिपब्लिकन पक्षाचा सदैव पुढाकार राहिला आहे, असेही आठवले म्हणाले.

रिपब्लिकन पक्षाचा मुंबई प्रदेशचा मेळावा येत्या २८ मे रोजी चुनाभट्टीतील सोमय्या मैदानावर होणार आहे. मुंबई महापालिका निवडणुकीत रिपब्लिकन पक्षाचे २५ नगरसेवक निवडून आणण्यासाठी तयारीला लागा. मुंबईत रिपब्लिकन पक्ष कुणाचीही दादागिरी चालू देणार नाही, असा इशारा देण्यासाठी मेळाव्यात पक्षाचे शक्तिप्रदर्शन घडवा, असे आठवले यांनी म्हटले आहे.