Sharad Pawar News : शिरूरमधून कोल्हे, साताऱ्यातून पाटील यांना पुन्हा संधी ?; पवार गटाकडून उमेदवारांची चाचपणी

Sharad Pawar NCP News : आगामी काळात होत असलेल्या निवडणुकीची तयारी सर्वच पक्षांनी सुरू केली आहे. इंडिया आघाडीतील घटक पक्ष असलेल्या राष्ट्रवादी काँग्रेसच्या शरद पवार गटाकडून लोकसभेसाठी उमेदवाराची चाचपणी करण्यास सुरुवात झाली आहे.

मुंबईत त्यासाठी १८ आणि १९ ऑक्टोबरला आढावा बैठक होत आहे. आणि त्यामध्ये आढावा घेतला जाणार आहे. यामध्ये शिरूरमधून खासदार अमोल कोल्हे, तर सातारा लोकसभा मतदारसंघातून खासदार श्रीनिवास पाटील यांना पुन्हा संधी दिली जाणार का? याकडे सर्वांचे लक्ष असणार आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

निवडणुकीच्या पार्श्वभूमीवर राष्ट्रवादी काँग्रेसने (शरद पवार गट) लोकसभा मतदारसंघांचा आढावा घेण्यास सुरुवात केली आहे. गुरुवार (ता. १८) व शुक्रवारी (ता. १९) याबाबत बैठका होत आहेत. गुरुवारी कोल्हापूर, हातकणंगले, रावेर, बारामती, शिरूर, सातारा आणि माढा या मतदारसंघांचा आढावा घेण्यात येणार आहे.

शुक्रवारी दिंडोरी, नगर, हिंगोली, वर्धा, अमरावती, बीड, भिवंडी, जालना या लोकसभा मतदारसंघांचा आढावा घेण्यात येणार आहे. त्या ठिकाणची सद्यःस्थिती कार्यकर्त्यांकडून जाणून घेत कुठल्या ठिकाणी जागा जिंकण्याची संधी मिळणार, या जागांवर येत्या काळात दावा करण्यात येणार असल्याचे सांगण्यात आले. त्यासोबतच शिरूर लोकसभा मतदारसंघामधून खासदार अमोल कोल्हे यांना, तर सातारा लोकसभा मतदारसंघातून खासदार श्रीनिवास पाटील यांना पुन्हा संधी दिली जाणार का? याकडे सर्वांचे लक्ष असणार आहे. या दोन्ही नावावर बैठकीत काय खलबतं होणार, याकडे लक्ष लागून राहिले आहे.