शिंदे -फडणवीस जोडी शेतकऱ्यांच्या आत्महत्या थांबवेल...

मुंबई : देवेंद्र फडणवीस हे मंत्रीमंडळात सहभागी होण्याने एक मजबूती मिळाली असून त्यांच्या अनुभवाचा आम्हाला उपयोग करून घेता येणार आहे. मुख्यमंत्री एकनाथ शिंदे यांच्या नेतृत्वाखालील सरकारला आत्महत्या मुक्त महाराष्ट्र बनवायचा आहे. शेतकऱ्यांच्या जीवनात सुखाचे क्षण आणण्यासाठी आर्थिकदृष्ट्या त्यांच्या मागे उभे राहिले पाहिजे. त्यांच्या शेतीला पाणी देणे, पिके टिकविणे, त्याला दर देणे या गोष्टी केल्या जातील, असे शिवसेनेचे शिंदे गटाचे प्रवक्ते दीपक केसरकर यांनी स्पष्ट केले.

मुंबईत दीपक केसरकर यांनी पत्रकारांशी संवाद साधून देवेंद्र फडणवीस यांच्या मंत्रीमंडळातील सहभागाचा आम्हाला फायदाच होणार असल्याचे स्पष्ट केले. ते म्हणाले, मराठवाडा, विदर्भात आत्महत्या होत असतील तर महाराष्ट्रातील प्रत्येक शेतकरी त्यांच्याबद्दल सहानभुती बाळगतो. पश्चिम महाराष्ट्रात शेतकऱ्यांपुढे पर्यायी उत्पन्न आहे. तो आधार आम्ही त्यांना देऊ शकतो का, याविषयी चर्चा होते.

उद्धवसाहेबांविषयी आदर आहे. पण तो भावनिक प्रश्न आहे. कायदेशीर लढाई लढावी लागणार असून ते आमचा हक्क असून पुढचा लढा हा महाराष्ट्रातील विकासाचा लढा असेल. देवेंद्र फडणवीस यांचे मंत्रीमडळात सामील होण्याने एक मजबूती मिळाली आहे. त्यांची माहिती, नॉलेज आणि त्यांच्या अनुभवाचा उपयोग करता येईल. अपूर्ण प्रकल्प पूर्ण करताना कोणतेही राजकारण येणार नाही. आता हिंदूत्ववादी पक्ष म्हणून भाजपसोबत आमचे नाते राहिल.

सत्तेत राहताना त्यांच्यावर टीका करणे व दुसरीकडे त्यांच्यासोबत सत्ते बसणे असे होणार नाही. शिवसेना भाजपची मने ही जुळलेली असून आम्ही अनेक वर्षांचे सहकारी आहोत. शिवसेना प्रमुख बाळसाहेबांच्या नेतृत्वाखाली २५ वर्षे व त्यांच्यानंतर उद्धव साहेबांसोबत उर्वरित कालावधीत आम्ही राष्ट्रवादी आणि काँग्रेसशी जबरदस्त लढाई केली. आज शिवसैनिकांपेक्षा राष्ट्रवादी व काँग्रेसवाले त्यांना जवळचे वाटत असतील तर हा भ्रम कधीतरीच दूर होईल. शिवसेना व पक्षातील सर्वांचे आशिर्वाद शिंदे साहेबांच्या सोबत राहतील, असेही त्यांनी स्पष्ट केले.