Uddhav Thackeray: उद्धव ठाकरेंनी आक्रमक नेत्याला दिली मोठी जबाबदारी! पक्षांतर्गत संघर्षात रविकिरण इंगवलेंनी मारली बाजी

Kolhapur News: शिवसेना उद्धव बाळासाहेब ठाकरे पक्षातील अंतर्गत संघर्षात शहाराध्यक्ष रविकिरण इंगवले यांनी बाजी मारली आहे. कोल्हापूर उत्तर, कोल्हापूर दक्षिण आणि करवीर विधानसभा मतदारसंघातील जिल्हाध्यक्ष पदावर रविकिरण इंगवले यांची निवड करण्यात आली आहे.

शिवसेना मध्यवर्ती कार्यालयाकडून ही निवड यादी आज जाहीर करण्यात आली. कोल्हापूर दक्षिण शहर प्रमुखपदी हर्षल सुर्वे, उत्तर विधानसभा प्रमुखपदी विशाल देवकुळे यांची निवड करण्यात आली आहे.

विधानसभा निवडणुकीत दारुण पराभव झाल्यानंतर आगामी स्थानिक स्वराज्य संस्थेच्या निवडणुकीच्या पार्श्वभूमीवर कोल्हापुरात ठाकरेंच्या सेनेत नेतृत्व बदलाची मागणी होत होती. त्याबाबतच्या हालचालींना वेग आला होता.याआधीचे जिल्हाप्रमुख संजय पवार यांना दोन वर्षांपूर्वी शिवसेनेचे उपनेते केल्यानंतरही जिल्हाध्यक्ष पदाची जबाबदारी त्यांच्याकडेच राहिली आहे.

सध्या या पदासाठी कोल्हापूर शहरातील तीन शिलेदार इच्छुक होते. प्रत्येकाने आपापल्या परीने फिल्डिंग लावली होती. कोल्हापूर शहर करवीर आणि दक्षिण विधानसभा मतदारसंघातील जिल्हाध्यक्ष पद रिक्त होते.

त्यामुळे पक्षातील गटबाजी वारंवार चव्हाट्यावर येत असताना थेट नेतृत्वावर शंका उपस्थित करत इंगवले यांनी मातोश्रीपर्यंत निरोप पोहोच केली होती. जिल्हाध्यक्ष पदासाठी शहराध्यक्ष रविकिरण इंगवले, युवा सेनेचे माजी जिल्हाप्रमुख हर्षल सुर्वे, उपजिल्हाप्रमुख अवधूत साळुंखे यांच्यात चुरस निर्माण झाली होती.

शिवसेनेचे उपनेते संजय पवार, विजय देवणे विरुद्ध शहराध्यक्ष रविकिरण इंगवले असा सातत्याने अंतर्गत संघर्ष या पदावरून पाहायला मिळाला. आंदोलनाच्या माध्यमातून संघर्ष पाहायला मिळत होता. ज्या ठिकाणी संजय पवार, विजय देवणे यांचे आंदोलन सुरू असते. त्या ठिकाणी रविकिरण इंगवले उपस्थित नसतात, तर ज्या ठिकाणी रविकिरण इंगवले यांचे आंदोलन असते त्या ठिकाणी संजय पवार किंवा विजय देवणे उपस्थित नसतात.

त्यामुळे केवळ कोल्हापूर जिल्हा नव्हे तर राज्यस्तरावर कोल्हापूर जिल्ह्यातील ठाकरेंच्या शिवसेनेची बदनामी होत आहे. विधानसभेला दारूण पराभव झाल्यानंतर ठाकरे गटाला पुन्हा उभारी देण्याचे काम अपेक्षित होते. त्या पार्श्वभूमीवर ही निवड झाली आहे.