चंद्रकांतदादा अडचणीत! रुपाली चाकणकर 'अॅक्शन मोड'वर

मुंबई : खासदार सुप्रिया सुळे (Supriya Sule) यांच्यासंदर्भात बोलताना भाजपचे प्रदेशाध्यक्ष चंद्रकांत पाटील (Chandrakant Patil) यांची जीभ घसरली होती. चंद्रकांत पाटील यांच्या आक्षेपार्ह विधानाची गंभीर दखल राज्य महिला आयोगाने घेतली आहे. या आक्षेपार्ह विधानाबाबत चंद्रकांत पाटील यांना लेखी खुलासा करण्याचे निर्देश राज्य महिला आयोगाने आज दिले. हा खुलासा करण्यासाठी त्यांना दोन दिवसांचा कालावधी देण्यात आला आहे.

या प्रकरणी पुणे शहर लीगल सेलचे असीम सरोदे यांच्यासह अन्य काही जणांनी महिला आयोगाकडे धाव घेतली होती. त्यांनी याबाबत लेखी तक्रार केली आहे. याची आयोगाने गंभीर दखल घेतली आहे. पाटील यांनी या विधानांबाबत आयोगाकडे दोन दिवसांत लेखी खुलासा करावा, असे निर्देश आयोगाने दिले आहेत. महिला आयोगाचे अध्यक्षपद राष्ट्रवादी काँग्रेसच्या नेत्या रुपाली चाकणकर यांच्याकडे आहे.

महिला आज स्वकर्तृत्वाने शिक्षण, व्यवसाय, समाजकारण व राजकारणासह सर्वच क्षेत्रात आघाडीवर आहेत. त्यामुळे चंद्रकांत पाटील यांचे वक्तव्य महिलांच्या आत्मसन्मानला ठेच पोचवणारे आहे. यापुढे महिलांचा सन्मान राखला जाईल, याचे भान त्यांनी ठेवावे, असे आयोगाच्या अध्यक्षा रूपाली चाकणकर यांनी म्हटले आहे. ओबीसी आरक्षण आंदोलनात चंद्रकात पाटील यांनी सुप्रिया सुळे यांच्याबद्दल वादग्रस्त वक्तव्य केले होते.

आमदार पाटील यांनी बुधवारी खासदार सुप्रिया सुळे यांना उद्देशून ‘मसणात जावे’ असे बोलले होते. त्यावरून राजकीय आरोप-प्रत्यारोप रंगले आहेत. राष्ट्रवादी काँग्रेसकडून चंद्रकांत पाटील यांना त्याच भाषेत उत्तर दिले जात आहे. राष्ट्रवादी महिला प्रदेशाध्यक्ष विद्या चव्हाण, सक्षणा सलगर यांनी चंद्रकांत पाटलांचा खरपूस शब्दांत समाचार घेतला होता. तसेच, उपमुख्यमंत्री अजित पवारांनी त्यावर भाष्य केले. महाराष्ट्राची ती संस्कृती नाही. आम्ही पण खूप काही बोलू शकतो, पण आपल्या संस्कृतीचा विचार करुन गप्प बसतो, अशा शब्दांत उपमुख्यमंत्री अजित पवार (Ajit Pawar) यांनी चंद्रकांत पाटील यांना सुनावले.