Thane Guardian Minister: राज ठाकरे अन् एकनाथ शिंदेंच्या शिलेदारांची जुंपली; आजी-माजी आमदार आमने-सामने

Mumbai 22 Jan 2025: पालकमंत्री पदावरून युती सरकारमध्ये राजकीय गदारोळ सुरू आहे. महायुतीमधील पालकमंत्री पदाचा वाद अजूनही क्षमलेला दिसत नाही. काही जिल्ह्यातील महायुतीमधील मतभेद चव्हाट्यावर आले आहेत. उपमुख्यमंत्री एकनाथ शिंदे यांच्यावर ठाणे जिल्ह्याचे पालकमंत्री म्हणून जबाबदारी देण्यात आली आहे. त्यावरुन मनसे आणि शिवसेना नेत्यांमध्ये जुंपली आहे.

मनसेचे नेते माजी आमदार राजू पाटील यांनी याविषयावर तोंडसूख घेतल्यानंतर आता त्याला शिदेंचे शिलेदार कल्याण पश्चिमचे आमदार विश्वनाथ भोईर यांनी प्रत्युत्तर देत राजू पाटलांना फटकारलं आहे. ठाणे जिल्ह्यात आमदार गणेश नाईक यांना पालकमंत्री पद मिळाले नसल्याने आगरी समाज नाराज असल्याचे वक्तव्य राजू पाटील यांनी केले होते.

पालघर, रायगड, गडचिरोली यांची पालकमंत्री पद हवीत कशासाठी ? सेवा करायला की मेवा खायला ? हे राजकारण्यांना माहीत आहे. त्यामुळे जे काय चाललंय ते त्यांना लखलाभो असा टोला राजू पाटील यांनी मंगळवारी समाज माध्यमावर लगावला होता. "पालकमंत्री म्हणून एकनाथ शिंदे ज्या पद्धतीने काम करतील त्या पद्धतीने गणेश नाईक करतील का? याविषयी शंका आहे," असे आमदार विश्वनाथ भोईर यांनी म्हटले आहे.

शिंदे यांच्याकडे पालकमंत्रिपद आलं यात काही गैर नाही. गणेश नाईक पण मंत्री आहेत, समाजातील ज्येष्ठ नेते आहेत. त्यांचा पण विचार व्हायला पाहिजे होता. पण मला वाटतं एकनाथ शिंदे यांना दिलेल्या पालकमंत्रि पदाचा उपयोग सर्व पक्षातील लोकप्रतिनिधी, सामान्य जनता यांना जास्त होईल.

ठाणे जिल्ह्यात गणेश नाईक यांना पालकमंत्रिपद मिळेल, अशी जोरदार चर्चा होती. मात्र उपमुख्यमंत्री शिंदे यांच्या नावाची घोषणा पालकमंत्री म्हणून केली गेली. त्यावर राजू पाटील यांनी ठाणे जिल्ह्यात आगरी समाजाला ठेंगा, असे ट्विट केले होते. आमची सर्वांची अपेक्षा होती की गणेश नाईक यांना पालकमंत्री पद मिळावे. ते असते तर आगरी समाजाला ही न्याय मिळाला असता ही अपेक्षा इथल्या लोकांची होती त्या अनुषंगाने मी हे ट्विट केल्याचे त्यांनी सांगितले आहे.