Vasai-Virar Elections : काँग्रेसचा वसईत स्वबळाचा नारा; नेत्यांमध्ये एकमत होईना, 'मिशन 20'साठी लावणार ताकद

Congress Politics : आगामी स्थानिक स्वराज्य संस्थांच्या निवडणुकीत 20 नगरसेवक निवडून आणण्याचे वसई विधानसभा मतदारसंघात काँग्रेसने ठेवले आहे. 'मिशन २०' या धोरण राबवत स्वबळावर लढू, असे प्रतिपादन महाराष्ट्र प्रदेश काँग्रेस कमिटीचे प्रभारी सरचिटणीस जोजो थॉमस यांनी केले.

थाॅमस स्वबळाचा नारा देत असताना मात्र पक्षातूनच त्यांना विरोध होताना दिसतोय. काँग्रेस पक्षाचे जेष्ठ नेते विजय पाटील यांनी तर थेट सांगितले की, बाहेरून येणाऱ्यांना येथील परिस्थिती माहिती नसते. त्यांनी उगाचच या ठिकाणी येऊन काहीही घोषणा करू नयेत.

आगामी महापालिका निवडणुकीसाठी काँग्रेसमध्ये स्थानिक स्तरावर बांधणी जोरात सुरू असून, प्रत्येक 100 घरांसाठी एका कार्यकर्त्याची नियुक्ती करून 'मायक्रो-लेव्हल'वर काम सुरू असल्याची माहिती जोजो थॉमस यांनी दिली. तसेच, अस्तित्वात असलेल्या सर्व बूथ समित्या अधिक सक्रिय करण्याच्या सूचनाही देण्यात आल्या आहेत. उमेदवार निवडीबाबत पक्षाची भूमिका स्पष्ट आहे. केवळ सिद्ध झालेली जनसेवा आणि कार्यक्षमता यांच्या आधारावरच उमेदवारी दिली जाईल. तिकीट वाटपात बाहेरील कोणत्याही प्रभावाला किंवा वशिलेबाजीला स्थान नसेल, असे त्यांनी सांगितले.

धर्मनिरपेक्ष मतांचे विभाजन टाळण्यासाठी काँग्रेस पक्षातर्फे जोरदार प्रयत्न केले जातील, असेही त्यांनी स्पष्ट केले. भाजपच्या विजयाची शक्यता कमी करण्यासाठी काही समविचारी पक्षांनी काँग्रेसशी युतीसाठी संपर्क साधला आहे. मात्र, तूर्तास आघाडीबाबत कोणताही विचार नसून, भविष्यातील राजकीय परिस्थितीचे मूल्यमापन केल्यानंतरच याबाबत योग्य तो निर्णय घेतला जाईल, असे थॉमस यांनी म्हटले.

बविआसोबत आघाडी होणार?

एका बाजूला काँग्रेसचे प्रभारी सरचिटणीस वसईमध्ये येऊन स्वबळाची नारा देत असताना. दुसऱ्या बाजूला मात्र स्थानिक कार्यकर्ते आणि नेते मात्र महाविकास आघाडी आणि बहुजन विकास आघाडीसोबत युती करण्यासाठी आग्रही आहेत.

विजय पाटील म्हणाले की, जिल्हा परिषद आणि पंचायत समितीसाठी ज्या प्रकारे महाविकास आघाडी आणि बहुजनची युती झाली आहे. तशीच युती महापालिका निवडणुकीत ही आम्ही करणार आहोत.