Voter List : महाराष्ट्राची अंतिम मतदार यादी जाहीर : तब्बल ४० लाख डुप्लिकेट मतदार, अनेकांना यादीतून वगळले!

State Election Comission : महाराष्ट्रात पुढील कालावधीत विविध जिल्ह्यात स्थानिक स्वराज्य संस्थांच्या निवडणुका प्रस्तावित आहेत. या पाठोपाठ २०२४ मध्ये लोकसभेची निवडणूक व त्यानंतर महाराष्ट्र विधानसभेची निवडणूक पार पडणार आहे. याच अनुषंगाने आता राज्य निवडणूक आयोगाने महाराष्ट्राची अंतिम मतदार यादी जाहीर केली आहे. या अंतिम यादीत मतदारांची संख्या आणि वेगवेगळ्या मतदारांच्या वर्गवारीबाबत अनेक गोष्टी समोर आले आहेत.

महाराष्ट्राची अंतिम मतदारांची यादीं जाहीर करताना, निवडणूक आयोगाने काही गोष्टी नव्याने मांडल्या आहेत. महाराष्ट्रात सद्यस्थितीला एकूण ९ कोटी २ लाख ८५ हजार ८०१ मतदार आहेत. यात एक विशेष गोष्ट अशी की, डुप्लिकेट म्हणजेच दुबार मतदारांची संख्या तब्बल ४० लाखांपेक्षा अधिक असल्याचे आयोगाकडून स्पष्ट करण्यात आले आहे.

डुप्लिकेट मतदारांच्या ४० लाख मतदारांपैकी १६ लाख मतदारांवर निवडणूक आयोगाने कारवाई केलेली आहे. १६ लाख डुप्लिकेट मतदारांना यादीतून वगळत, ही यादी रद्द केली गेली आहे. महाराष्ट्रात सद्यस्थितीत एकूण ४ कोटी ७१ लाख ३५ हजार ९९९ पुरूष मतदार असून, ४ कोटी ३१ लाख २५ हजार ६७ महिला मतदार आहेत.

या यादीत दिव्यांग मतदारांचीही संख्याही देण्यात आलेली आहे. राज्यात एकूण १५ हजार ३३२ दिव्यांग मतदार आहेत, तर ४७३५ ट्रान्सजेंडर मतदारांची संख्या असल्याचे निवडणूक आयोगाने दिली आहे.