खडसेंनी स्वतः ट्रॅक्टर चालवत केली जंतूनाशकांची फवारणी

जळगाव : माजी मंत्री व भाजप नेते एकनाथ खडसे यांनी मुक्ताईनगर येथे स्वतः ट्रॅक्टर चालवत गावात जंतुनाशक फवारणी केली. कोरोना संसर्ग रोखण्यासाठी आज ही फवारणी केली. आपल्या कोथळी गावात त्यांनी ही फवारणी केली. त्याचे छायाचित्र त्यांनी आपल्या फेसबूक पेजवरुन प्रसिद्ध केले आहे. 

केवळ जंतूनाशकांची फवारणीच नव्हे तर येथे राष्ट्रीय महामार्गावर अन्नछत्राचीही उभारणी खडसे यांनी केली आहे. माझ्या पेन्शनचे एक लाख रुपये तसेच अतिरिक्त रक्कम टाकून उभारलेल्या या अन्नछत्रात मुंबई - सुरत येथून आपल्या गावाकडे पायी निघालेल्या लोकांना, महामार्गावरून जाणाऱ्या ट्रक चालकांना तसेच परिसरातील गरजू व गरीब नागरिकांना जेवण वाटप करण्यात येत आहे, अशी माहिती खडसे यांनी दिली आहे.