पिंपरी चिंचवड महापौर-पोलिसांत बाचाबाची; शिरोळमध्ये पूरग्रस्तांना मदतीवेळी प्रकार
जयसिंगपूर : शिरोळ तालुक्‍यातील पूरग्रस्तांच्या मदतीसाठी आलेले पिंपरी-चिंचवडचे महापौर राहुल जाधव आणि शिरोळ पोलिसांमध्ये काल बाचाबाची झाली. मदतकार्यात पोलिसांकडून जाणीवपूर्वक अडथळा आणण्याचा प्रयत्न झाल्याचा आरोप महापौर जाधव यांनी केला.
महापौर जाधव आणि आमदार महेश लांडगे यांच्या मार्गदर्शनाखाली आपत्ती व्यवस्थापन संघ पुणे, मुळशी आपत्ती व्यवस्थापक समिती, लवासा लेक शोअर वॉटर स्पोर्ट, ऍम्बी व्हॅली सिटी सहारा इंडिया, महेशदादा स्पोर्ट फाऊंडेशन यांच्यावतीने शिरोळ तालुक्‍यातील विविध गावांमध्ये मदतकार्य सुरू आहे. सहा बोटी आणि 55 जणांकडून पूरग्रस्त गावात जाऊन जीवनावश्‍यक वस्तूंचे वाटप करण्याबरोबर मदतीसाठीचा सर्व्हे केला जात आहे.
महापौर जाधव आणि सहकारी हसूरच्या दिशेने जाण्यासाठी निघाले. यावेळी बंदोबस्तावर असणाऱ्या पोलिसांनी त्यांना रोखले. यावेळी महापौर आणि पोलिसांत वादावादी झाली. आम्ही 55 जण पूरग्रस्तांसाठी मदतकार्यात आहोत. स्वत: खर्च करून ही मोहीम हाती घेतली आहे. असे असताना कशासाठी रोखता? असा सवाल जाधव यांनी केला. तासभर विनवणी करूनही पोलिसांनी त्यांना सोडण्यास नकार दिला.
चिंचवाडचे अजित चौगुले, पिंपरी-चिंचवडचे नगरसेवक विजय लांडे, प्रमोद बलकवडे, शाम पटेल, सॅडविन मेंझोस यांच्यासह काहींनी मध्यस्थी केल्यानंतर केवळ महापौरांना सोडू, असा पवित्रा पोलिसांनी घेतला. मात्र, मदतकार्यात असणाऱ्या नगरसेवकांना सोडण्यास नकार दिल्यानंतर गोंधळ उडाला. अखेर पोलिसांच्या अपमानास्पद वागणुकीनंतर पथक दुपारी निघून गेले.
पोलिसांनी जाणीवपूर्वक मदत कार्यापासून रोखले. कोण महापौर? आम्ही ओळखत नाही? असे उर्मट वक्तव्यही केले. शिरोळचे पोलिस निरीक्षक श्रीकृष्ण कटकधोंड आणि परब व पवार या तिघांची मुख्यमंत्री देवेंद्र फडणवीस आणि पालकमंत्री चंद्रकांत पाटील यांच्याकडे तक्रार करणार आहे. पूरग्रस्तांच्या कार्यात याचा अडथळा आणू देणार नाही. पूर ओसरल्यानंतर आम्ही मदतकार्यात आघाडी घेऊ.
- राहुल जाधव, महापौर, पिंपरी-चिंचवडमहापौर राहुल जाधव व अथवा त्यांच्या लोकांना मदतकार्यापासून परावृत्त केले नाही. आज पूरग्रस्तांना पिण्याच्या पाण्याची गरज आहे. जनावरांना चारा नेण्याबरोबर जीवनावश्‍यक वस्तूंचा पुरवठा करावा यावर प्रशासन आग्रही आहे. केवळ गैरसमजातून हा प्रकार घडला आहे.
- किशोर काळे, उपविभागीय पोलिस अधिकारी, जयसिंगपूर
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.