राष्ट्रवादीचा उद्या मुंबईत भव्य मोर्चा; खासदार सुप्रिया सुळे नेतृत्व करणार

पिंपरी : जालना जिल्हयातील १९ वर्षीय तरुणीवर झालेल्या सामुहिक बलात्कार प्रकरणी राष्ट्रवादी काँग्रेसच्या उद्या सकाळी ११ वाजता मुंबईतील चुनाभट्टी पोलिस ठाण्यावर भव्य मोर्चा काढण्यात येणार आहे. खासदार सुप्रिया सुळे व पक्षाचे मुंबई विभागीय अध्यक्ष आणि पक्षाचे राष्ट्रीय प्रवक्ते नवाब मलिक यांच्या नेतृत्वाखाली चेंबुर लाल डोंगर ते चुनाभट्टी पोलिस ठाणे असा हा भव्य मोर्चा काढला जाणार आहे.

जालना जिल्ह्यातील घनसावंगी तालुक्यातील या तरुणीवर मुंबईतील चेंबुर परिसरात चार नराधमांनी विषारी ड्रग्ज पाजवून सामूहिक बलात्कार केला होता. या पीडितेची महिनाभर मृत्यूसोबत सुरू असलेली झुंज काल रात्री अखेर संपली आहे. या घटनेला एक महिना उलटल्यानंतरही अद्याप आरोपींना अटक झालेली नाही. या घटनेच्या निषेध म्हणून हा मोर्चा काढला जाणार आहे.