ED action on IAS IPS : देशातील IAS-IPS हादरले; ‘ईडी’कडून एकाचवेळी तब्बल 10 वरिष्ठ अधिकाऱ्यांवर कारवाईचा बडगा

IAS IPS corruption : सक्तवसुली संचालनालयाने एका घोटाळ्याप्रकरणी एकाचवेळी तब्बल दहा आयएएस, आयपीएस अधिकाऱ्यांवर कारवाईची शिफारस केली आहे. त्यामुळे देशातील प्रशासनात खळबळ उडाली आहे. अशाप्रकारे ईडीकडून एकाचवेळी दहा वरिष्ठ अधिकाऱ्यांवर भ्रष्टाचाराच्या कथित आरोपांखाली कारवाईची शिफारस करण्याची ही पहिलीच वेळ असल्याचे सांगितले जात आहे.

छत्तीसगढमधील तब्बल 570 कोटींच्या हायप्रोफाईल कोळसा घोटाळा प्रकरणात ईडीने ही शिफारस केली आहे. भ्रष्टाचारविरोधी कायद्याचे उल्लंघन झाल्याचा आरोप ईडीने केला आहे. छत्तीसगढचे मुख्य सचिव अमिताभ जैन आणि आर्थिक गुन्हे शाखेकडे ईडीने ही शिफारस पाठविली आहे. त्यामध्ये संपूर्ण तपासाची माहितीही देण्यात आली आहे.

प्रशासकीय आदेशांच्या माध्यमातून कोळसा लेव्हीमध्ये अनियमितता केल्याचे आढळून आले आहे. ईडीच्या म्हणण्यानुसार, ऑनलाईन कोळसा परवाने ऑफलाईन करून अवैधपणे लेव्ही वसुली करण्यात आली. 15 जुलै 2020 मध्ये तत्कालीन खनिज संचालक आएएस समीर विश्नोई यांनी आदेश दिला होता. त्यानुसार कोळसा ट्रेडर्सकडून अवैध वसुलीची प्रक्रिया सुरू झाली.

घोटाळ्यातील प्रमुख आरोपी उद्योजक सूर्यकांत तिवारी यांचे नाव घेतले जात आहे. त्यांच्यासह आयएएस अधिकारी विश्नोई, रानू साहू आणि सौम्या चौरासिया यांचीही नावे समोर येत आहेत. चौरासिया या तत्कालीन मुख्यमंत्री भूपेश बघेल यांच्या उपसचिव होत्या. या अधिकाऱ्यांना जानेवारी 2024 मध्ये आर्थिक गुन्हे शाखेकडून गुन्हा दाखल करण्यात आल्यानंतर अटक झाली होती. सध्या ते जामिनावर तुरूंगातून बाहेर आहेत.

ईडीने चौकशी अहवालात म्हटले आहे की, संपूर्ण घोटाळा नियोजनबध्द होता. कोळसा परवान्यांच्या दुरूपयोग करून मोठी रक्कम वसूल करण्यात आली. अधिकारी आणि व्यापाऱ्यांमध्ये समन्वय ठेवून एक मोठी साखळी निर्माण करण्यात आली होती. त्याअंतर्गत कोट्यवधी रुपयांचा घोटाळा करण्यात आला. या घोटाळ्यात वरिष्ठ आयएएस आणि आयपीएस अधिकाऱ्यांच्या भूमिकेवर संशय व्यक्त केला असून त्यांच्याकडून जाणीवपूर्वक नियमांचे उल्लंघन केल्याचेही ईडीने म्हटले आहे. ईडीच्या या शिफारशीनंतर आता सरकार काय कारवाई करणार, याबाबत उत्सुकता वाढली आहे.