Ajit Pawar Funeral : अजित पवारांच्या अंत्ययात्रेदरम्यान अंगरक्षकांना अश्रू अनावर, काल लँडिंगपूर्वी दादांनी फोन करून विचारलं होतं, 'आला आहात ना...?'

Pune News, 29 Jan : महाराष्ट्राचे उपमुख्यमंत्री आणि राष्ट्रवादी काँग्रेसचे नेते अजित पवार यांच्या विमान अपघातातील दुर्दैवी निधनानंतर राज्यावर शोककळा पसरली आहे. काल सकाळी मुंबईहून बारामतीकडे निघालेल्या खासगी विमानाला बारामती विमानतळाजवळ लँडिंगदरम्यान भीषण अपघात झाला. या अपघातात अजित पवार यांच्यासह विमानातील सर्व ५ जणांचा मृत्यू झाला.

अपघाताच्या वेळी अजित पवार यांचे दीर्घकाळीन अंगरक्षक (एसपीयू) महेश बोबडे आणि इम्तियाज मोमिन हे विमानतळ परिसरात उपस्थित होते. अजित पवार यांनी लँडिंगपूर्वीच फोनवरून सुरक्षारक्षकांना संपर्क करून "विमान लँड होत आहे, तुम्ही आला आहात ना?" असा प्रश्न विचारला होता.

त्यांनतर काही क्षणांतच विमान धावपट्टीजवळच शेतात कोसळले. सुरुवातीला हे एखादे शिकाऊ विमान असावे असा समज झाला, मात्र GPS तपासल्यानंतर हे अजित पवार यांचे विमान असल्याचे निष्पन्न झाले. या धक्क्यातून दोघेही हादरले आणि तातडीने घटनास्थळी पोहोचून मदतकार्य करण्याचा प्रयत्न केला, मात्र अपघाताची तीव्रता इतकी भीषण होती की काहीच करता आले नाही.

गेल्या अनेक वर्षांपासून हे दोघे अजित पवार यांच्या 'सावलीसारखे' साथीदार होते. आज अंत्ययात्रेच्या रथावर उभे राहिलेले महेश बोबडे आणि इम्तियाज मोमिन यांचे अश्रू अनावर झाले. "पोलिसांना भावना नसतात" हे वाक्य सहजतेने म्हटले जाते, पण या दोघांनी दाखवले की खोलवर मानवी भावना असतात. अजित पवार यांच्या अखेरच्या मानवंदनेसाठी ते उपस्थित होते.

तेव्हा त्यांच्या डोळ्यांतून वाहणारे अश्रू हे त्यांच्या निष्ठेचे आणि प्रेमाचे प्रतीक ठरले. बारामतीत आज अजित पवार यांचे शासकीय इतमामात अंत्यसंस्कार होणार आहेत. हजारो कार्यकर्ते आणि नेते उपस्थित राहणार असून, राज्यातील राजकीय वर्तुळात शोक आणि शून्यता पसरली आहे. अजित पवार यांच्या जाण्याने महाराष्ट्राच्या राजकारणात एक मोठी पोकळी निर्माण झाली आहे.