Ajit Pawar News : मला समजून सांगता येत नाही; अजितदादांनी स्पष्टच सांगितले अन् राहुल कलाटेंनाही सूचक इशारा

Pimpri-Chinchwad News : चिंचवडमध्ये आघाडीत शिवसेना (उद्धव बाळासाहेब ठाकरे) पक्षात झालेल्या बंडखोरीचा संदर्भ देत विरोधी पक्षनेते अजित पवार (Ajit Pawar) यांनी नुकत्याच झालेल्या विधानपरिषद निवडणुकीतही ती औरंगाबादमध्ये झाल्याचे सांगितले.

अजित पवार, काँग्रेसचे प्रदेशाध्यक्ष नाना पटोले आणि शिवसेनेचे नेते आदित्य ठाकरे (Aditya Thackeray) यांनी महाविकास आघाडीचे चिंचवड पोटनिवडणुकीचे उमेदवार नाना काटे यांच्यासाठी प्रचार सभा घेतली. यावेळी अजित पवार यांनी शिंदे-फडणवीस सरकारवर जोरदार हल्लाबोल केला.

चिंचवड पोटनिवडणुकीत ठाकरे गटाचे नेते राहुल कलाटे यांनी बंडखोरी केली आहे. शिवसेनेचे नेते सचिन अहिर (Sachin Ahir) यांनी प्रयत्न करुनही कलाटे यांनी माघार घेतली नाही. आज अजित पवार यांनी नाव न घेता राहुल कलाटे (Rahul Kalate) यांच्यावर हल्लाबोल केला. ते म्हणाले, या निवडणुकीत औरंगाबाद मतदारसंघात आघाडीत (राष्ट्रवादीत) बंडखोरी झाली होती.

चिंचवडप्रमाणे त्या बंडखोराचीही समजूत काढण्याचा प्रयत्न मी वगळता सर्वांनी केला. कारण मला समजून सांगता येत नाही, असे ते म्हणताच उपस्थितांत हशा पिकला. बरं झालं मी या बंडखोराला फोन करूनही तो लागला नाही, असे ते पुढे म्हणताच आणखी हशा पिकला.

चिंचवडप्रमाणे औरंबादमध्येही बंडखोराने माघार घेतली नाही. पण, त्याची परिणती त्याला अवघी चारशे मते मिळण्यात झाली, असे सांगत चिंचवडमधील बंडखोराचीही, अशीच गत होणार असल्याचे त्यांनी सूचित केले.