Ajit Pawar vs Murlidhar Mohol : अजितदादांसमोर मुरलीअण्णांची माघार नाहीच, आत्ता फैसाल निवडणुकीच्या मैदानात!

Ajit Pawar News : महाराष्ट्र ऑलिंपिंक संघटना निवडणूकीत अजित पवार-मुरलीधर मोहोळ अशी थेट लढत होणार आहे. संघटनेच्या अध्यक्षपदासाठी दोघांनी अर्ज केले होते. शनिवारी (ता.18) अर्ज मागे घेण्याचा शेवटचा दिवस होता. मात्र, दोघेही आपल्या उमेदवारीवर ठाम राहिले. त्यामुळे अध्यक्षपदासाठी दोघांमध्ये थेट सामना होणार आहे.

चार उपाध्यक्षपदचा अपवाद वगळता इतर सर्व पदांसाठी कोणीही माघार घेतलेली नाही. दरम्यान, महाराष्ट्र ऑलिंपिंक संघटनेचे अध्यक्षपद अजित पवार यांनी सलग तीन वेळा भूषवले आहे. चौथ्यांदा ते निवडणुकीच्या मैदानात आहेत.

दोन नोव्हेंबरला निवडणूक पार पडणार असून तीन संघटनांचे प्रत्येक दोन सभासद या निवडणुकीत मतदान करणार आहेत. त्यामुळे 60 मतदार नवीन अध्यक्ष अजितदादा की मुरलीअण्णा हे ठरवणार आहेत. उपमुख्यमंत्री आणि केंद्रीय मंत्र्यांमध्ये लढत होत असल्याने ही निवडणूक दोघांसाठी देखील प्रतिष्ठेची असणार आहे.

अजित पवारांनी कबड्डी संघटनेतून उमेदवारी अर्ज दाखल केला होता.तर, मुरलीधर मोहोळ यांनी कुस्ती महासंघाच्या माध्यमातून उमेदवारी अर्ज दाखल केला आहे.दरम्यान, आदिल सुमारीवाला, दयानंद कुमार, प्रदीप गंधे, प्रशांत देशपांडे हे उपाध्यक्षपदासाठी बिनविरोध असणार असल्याचे निश्चित झाले आहे. तर, नामदेव शिरगावकर आणि संजय शेट्ये यांच्यात सरचिटणीसपदासाठी लढत होणार आहे.