पंतप्रधान मोदींच्या सभेला १० हजारांहून अधिक लोकांची उपस्थिती

पुणे : पंतप्रधान नरेंद्र मोदी काही वेळेत देहू येथील सभास्थानी पोचत असून या सभेला दहा हजाराहून वारकरी तसेच भारतीय जनता पार्टीचे कार्यकर्ते उपस्थित आहेत.देहूत श्री संत तुकाराम महाराजांच्या शिळा मंदिराचे पंतप्रधान मोदींच्या हस्ते लोकार्पण होत आहे. देशाचे पंतप्रधान देहू नगरीत येण्याची ही पहिलीच वेळ असल्याने वारकरी तसेच पक्षाच्या कार्यकर्त्यांशिवाय स्थानिक नागरीक मोठ्या संख्यने सभास्थानी उपस्थित आहेत.

सभास्थानी मोठा पोलीस बंदोबस्त आहे. सभेच्या ठिकाणी पोचणाऱ्या प्रत्येकाची तपासणी करूनच सोडण्यात येत आहे. ज्यांनी काळे कपडे परिधान केले आहेत, काळा मास्क किंवा कोणत्याही स्वरूपातील काळे कापड घातलेल्यांना प्रवेश नाकारण्यात येत आहे. पाण्याची बाटली तसेच इतर कोणत्याही वस्तू घेऊन प्रवेश करण्यास प्रतिबंध करण्यात येत आहे.

या सोहळ्यासाठी काही वेळातच पंतप्रधानांचे आगमन होत आहे. दरम्यान,सभास्थळी भक्ती संगीत कार्यक्रमाचे आयोजन करण्यात आले आहे. गायक कल्याण गायकवाड, कार्तिकी गायकवाड , कौस्तुभ गायकवाड तुकोबारायांच्या विविध रचना सादर करीत आहेत. राज्यातून तसेच राज्याबाहेरील काही भाविकांनी या कार्यक्रमास हजेरी लावली आहे. सभास्थळी कडेकोट पोलिस बंदोबस्त असून तपासणी करूनच आत सोडले जात आहे.