भाजपने पिंपरी चिंचवड महापालिका निवडणुकीसाठी इच्छुकांच्या मुलाखती घेण्यास सुरुवात केली आहे. पहिल्याच दिवशी 350 पेक्षा जास्त इच्छुकांनी मुलाखती दिल्या. बुधवारीही (ता.१७) मुलाखती होणार आहेत. या मुलाखती घेताना विधानसभा मतदारसंघनिहाय विभागणी न करता सरसकट अनुक्रमे प्रभागनिहाय मुलाखती घेतल्या जात आहेत. त्यामुळे उमेदवार ठरवताना कोणत्याही एका आमदाराचा प्रभाव दिसणार नाही, याची दक्षता पक्ष नेतृत्वाने घेतली असल्याचे दिसले.
भाजप आणि राष्ट्रवादी काँग्रेस स्वतंत्रपणे लढण्याचा निर्णय मुख्यमंत्री देवेंद्र फडणवीस यांनी जाहीर केला आहे. त्याला राष्ट्रवादी काँग्रेसचे अध्यक्ष अजित पवार यांनीही दुजोरा दिला. यापाठोपाठ महापालिका निवडणुकांचा कार्यक्रम राज्य निवडणूक आयोगाने जाहीर केला. त्यामुळे भाजपनेही तयारीला गती दिली आहे. यानंतर इच्छुकांच्या पिंपरी मोरवाडीतील पक्ष कार्यालयात मुलाखती सुरू झाल्या. शहरातील चारही भाजप आमदार आणि शहराध्यक्ष शत्रुघ्न काटे यांनी मुलाखती घेतल्या.
पिंपरी चिंचवड शहरातील भाजपच्या चारही आमदारांची तोंडं चार दिशांना असतात. चारही आमदार स्वतःचा गट मजबूत करण्यासाठी प्रयत्न करत असतात, अशी तक्रार सातत्याने केली होती. पण या मुलाखतीनिमित्त का होईना पण महापालिका निवडणुकीसाठी पहिल्यांदाच भोसरी मतदारसंघाचे आमदार महेश लांडगे, चिंचवडचे आमदार शंकर जगताप, विधानपरिषदेच्या सदस्या उमा खापरे, विधानपरिषद सदस्य अमित गोरखे आणि पक्षाचे शहराध्यक्ष शत्रुघ्न काटे एकत्र आले होते.
पिंपरी-चिंचवड शहरातील पक्ष सुरवातीपासूनच 2 आमदारांमध्ये पक्ष विभागला गेला होता. अशात आधी उमा खापरे आणि नंतर अमित गोरखे विधान परिषदेचे आमदार झाले. आता या चारही आमदारांचे चार वेगवेगळे गट शहरात सक्रिय असल्याचे दिसते. त्यात विधानसभा निवडणुकीवेळी काटे यांनी तत्कालीन अध्यक्ष आणि भाजपचे चिंचवड विधानसभेचे उमेदवार असलेल्या शंकर जगताप यांच्याविरोधात बंड केले. त्याबदल्यात काटे यांना सुरवातीला शहर कार्याध्यक्ष व नंतर शहराध्यक्षपद देण्यात आले.
काटे यांना शहराध्यक्ष करताना काही जुने कार्यकर्ते पुढाकार घेत होते. त्यामुळे त्यांची निवड झाली त्यावेळी कार्यकर्त्यांना महत्त्व येण्याची तसेच त्यांना एकत्र करून संघटन होण्याची अपेक्षा होती. मात्र तेही व्यक्तिकेंद्रित धोरणांना प्राध्यान्य देताना दिसले. याच सगळ्यावरून नुकतेच चिंचवडमध्ये झालेल्या कार्यकर्ता मेळाव्यात भाजपचे प्रदेश महामंत्री राजेश पांडे यांनी, ‘पिंपरी चिंचवड शहरात नेते जास्त झालेत, नेते हे कार्यकर्ते असावेत!’ असे सूचक विधान केले होते. अंतर्गत गटबाजीला चाप लावण्यासाठीच हे विधान होते, अशी चर्चा आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.