Congress News: महाराष्ट्रात काँग्रेसला धक्क्यावर धक्के; बड्या नेत्यानं 'आऊटगोईंग' रोखण्यासाठी काढला 'हा' पर्याय

Pune News : विधानसभा निवडणुकीनंतर राज्यामध्ये काँग्रेसला गळती लागली आहे. या पार्श्वभूमीवर महाराष्ट्र काँग्रेसचे प्रभारी रमेश चेन्निथला यांनी पुण्यातील चिंतन बैठकीत भावनिक आवाहन करताना कार्यकर्ते आणि नेत्यांना एकनिष्ठ राहण्याचा संदेश दिला आहे.

महाराष्ट्र काँग्रेसचे प्रदेशाध्यक्ष हर्षवर्धन सपकाळ (Harshwardhan Sapkal) यांच्या नेतृत्वाखाली नवीन कार्यकारिणीची नियुक्ती करण्यात आली आहे. या कार्यकारिणीची दोन दिवसीय चिंतन बैठक पुण्यामध्ये पार पडत आहे. बैठकीच्या निमित्ताने अनेक वरिष्ठ नेत्यांनी पदाधिकाऱ्यांना मार्गदर्शन केलं आहे.

आगामी निवडणुकांच्या पार्श्वभूमीवर आयोजित या बैठकीत चेन्निथला यांनी पक्षासमोरील आव्हाने आणि जबाबदाऱ्यांवर भाष्य केले. ज्यांना काँग्रेसने (Congress) सर्व काही दिले, ते नेते पक्ष सोडून गेले, परंतु कार्यकर्ते आजही पक्षाशी एकनिष्ठ आहेत. असं चेन्निथला म्हणाले.

चेन्निथला म्हणाले, “ज्यांना काँग्रेसने जास्तीत जास्त दिले, ते सगळे पक्ष सोडून गेले. पण कार्यकर्ते आजही पक्षासोबत आहेत. अशा अडचणीच्या काळात पक्षाला सोडू नका. पक्ष जो उमेदवार देईल, त्याच्यासाठी एकदिलाने प्रचार करा. पक्षाच्या विरोधात काम करू नका.” गेलेल्या नेत्यांना पक्षात परत घेतले जाणार नाही, अशी ठाम भूमिका मांडली.

या बैठकी दरम्यान सर्व नेत्यांना आणि पदाधिकाऱ्यांना शपथ देण्यात आली की, ते काँग्रेसच्या विरोधात काम करणार नाहीत आणि पक्षाने निवडलेल्या उमेदवारासाठीच प्रचार करतील.

काँग्रेसचे महाराष्ट्र प्रभारी रमेश चेन्निथला यांनी कार्यकर्त्यांना एकजुटीने काम करण्याचे आवाहन केले आणि पक्षाला मजबूत करण्यासाठी सर्वांनी एकत्र येण्याची गरज असल्याचे अधोरेखित केले. पक्षाच्या यशासाठी सर्वांनी एकदिलाने आणि निष्ठेने काम केले पाहिजे. तसेच आगामी स्थानिक स्वराज्य संस्थांच्या निवडणुकीसाठी सज्ज राहणार असल्याचंही त्यांनी सांगितले.