चिंता वाढली : कोरोनाची पुन्हा उसळी

पिंपरी : कोरोनाने (Covid-19) शहरात पुन्हा डोके वर काढल्याने पिंपरी-चिंचवड महापालिका (Pcmc) प्रशासनाची चिंता पुन्हा वाढली आहे. तसेच आतापर्यंत घरीच उपचार घेणारे रुग्ण आता रुग्णालयात दाखल होण्यास सुरुवात झाली आहे. (Covid 19 Latest Marathi News)

पिंपरी-चिंचवड शहरातील रुग्णसंख्या एक आकडी झाल्याने कोरोनाची तिसरी लाट शमली असे वाटून प्रशासन गेल्या महिन्यात काहीसे निर्धास्त झाले होते. मात्र, त्यांची चिंता या महिन्यात पुन्हा वाढली आहे. कारण गेल्या काही दिवसांपासून कोरोना रूग्ण झपाट्याने वाढू लागले आहेत. शिवाय आतापर्यंत ते रुग्णालयात दाखल होत नव्हते. परंतू आजपासून ते ही सुरू झाल्याने प्रशासन पुन्हा सतर्क झाले आहे.

दरम्यान, आज (ता.17 जून) 99 नवे कोरोनाचे रुग्ण शहरात आढळून आले. त्यामुळे एकूण रुग्ण आकडा 421 वर गेला. काल 96 नवीन रुग्ण सापडले होते. या महिन्याच्या 1 तारखेला फक्त नऊ जणांना शहरात कोरोनाचा प्रार्दुभाव झाला होता. त्या दिवशी एकूण रुग्ण 61 होते. 15 दिवसांत हा आकडा सातपटीने वाढला आहे. यामुळे कोरोनाबाबत पुन्हा काळजी घेणे आवश्यक झाले आहे.