धोका वाढला!`स्वाइन फ्लू`नंतर आता गोवरसाठीही क्वॅारंटाईन सेंटर सुरु होण्याची शक्यता

पिंपरी:स्वाईन फ्लूचे उच्चाटन होत नाही, तोच गोवर या दुसऱ्या संसर्गजन्य आजाराची साथ आली असून मुंबईत, तर तिने कहर केला आहे. पिंपरी-चिंचवडमध्येही ती येण्याची भीती असल्याने शहराचे कारभारी आमदार लक्ष्मण जगताप यांनी पालिका आयुक्त तथा प्रशासक शेखर सिंह यांना वेळीच सावध केले आहे. महापालिकेच्या (PCMC) वायसीएम रुग्णालयात (YCM) गोवर आयसोलेशन कक्ष त्वरित सुरु करण्याची मागणी त्यांनी आज केली. (PCMC, YCM, quarantine Center Latest News)

उद्योगनगरीसह पुण्यातही वेगाने पसरणाऱ्याा गोवर आजाराने डोके वर काढण्यास सुरूवात केली आहे. त्यामुळे तो मोठ्या प्रमाणात पसरल्यास अनेक लहान बालकांच्या जिवाला धोका ठरू शकतो, याकडे आमदार जगतापांनी प्रशासनाचे लक्ष वेधले आहे.

त्यामुळे या आजाराबाबत निष्काळजीपणा करून चालणार नाही,असा सावधगिरीचा इशारा त्यांनी दिला आहे. या आजारावर अद्याप कोणतेही औषध नसल्याने लस देणे हा एकमेव पर्याय आहे. तसेच तो झाल्यानंतर केवळ त्याची लक्षणे नियंत्रित करून उपचार केले जातात. त्यामुळे या रोगाला तातडीने प्रतिबंध करण्यासाठी आणि परिस्थिती हाताबाहेर जाऊ नये म्हणून स्वतंत्र गोवर आयसोलेशन कक्ष प्रशासनाने तयार करण्याची नितांत गरज. त्यांनी प्रतिपादित केली.

दरम्यान, शहरात डेंग्यूने देखील विळखा घातल्याने त्यालाही पायबंद घालण्यासाठी विशेष उपाययोजना करावी,अशी मागणी जगताप यांनी केली आहे.आधीच कोरोनामुळे त्रस्त होऊन त्यातून कसेबसे सावणाऱ्या नागरिकांना पुन्हा संसर्गजन्य आजारांनी त्रस्त केले आहे. त्यामुळे महापालिका प्रशासनाने नागरिकांच्या आरोग्याबाबत विशेष काळजी घेण्याची आवश्यकता आहे, असेही ते म्हणाले.