Pune Land Scam Case : जमीन व्यवहार प्रकरणात नायब तहसीलदारांनीच लावली तहसीलदारांची बत्ती; पार्थ पवारांच्या कंपनीचे संचालकही अडकले

Land Scam News : पुण्यातील मुंढवा आणि बोपोडी येथील जमीनचे गैरव्यवहार समोर आले. विशेष म्हणजे या दोनही प्रकरणात पुणे तहसीलदारांनी 'उद्योग' केल्याचे उघड झाले आहे. या दोन्ही प्रकरणात येवले यांच्यासह नऊ जणांविरुद्ध पोलिसांनी गुन्हा दाखल करण्यात आला आहे. नायब तहसीलदार प्रविणा बोर्डे यांनी सरकारतर्फे खडक पोलिस ठाण्यात तक्रार दिली आहे.

नायब तहसीलदार प्रविणा बोर्डे यांनी दिलेल्या फिर्यादीनुसार, तहसीलदार सूर्यकांत येवले, हेमंत गावंडे (रा. इंद्रा मेमरीज, बाणेर रस्ता), राजेंद्र रामचंद्र विध्वंस, हृषीकेश माधव विध्वंस, मंगल माधव विध्वंस (तिघे रा. नवी पेठ) विद्यानंद अविनाश पुराणिक (रा. इंदूर, मध्यप्रदेश), जयश्री संजय एकबोटे (रा. कुलाबा, मुंबई) या सात जणांवर गुन्हा दाखल करण्यात आला आहे.

मिळालेल्या माहितीनुसार, तहसीलदार सूर्यकांत येवले यांनी १२ फेब्रुवारी २०२४ ते १ जुलै २०२५ या कालावधीत अधिकारांचा गैरवापर केला. पाच हेक्टर 35 आरची बोपोडीमधील कृषी विभागाच्या मालकीची जागा एका खासगी व्यक्तीच्या नावे करून देण्याचा आदेश येवले यांनी दिला.

येवले यांनी कृषी खात्याची जमीन शासनाच्या नावावर नोंद असतानाही मुंबई कुळ वहिवाट व शेतजमीन अधिनियम लागू नसतानाही त्या अधिनियमान्वये बेकायदेशीर कागदपत्रे तयार केली. तसेच ती जमीन खासगी व्यक्तीच्या नावे करण्याचा आदेश दिला.