Devendra Fadanvis : अशोक चव्हाणांना भेटलोच नाही : फडणवीसांनी वृत्त फेटाळले

पुणे : काँग्रेसचे नेते तथा माजी मुख्यमंत्री अशोक चव्हाण (Ashok Chavan) आणि उपमुख्यमंत्री देवेंद्र फडणवीस (Devendra Fadnavis) यांची गुरुवारी (ता. १ सप्टेंबर) भाजप (BJP) पदाधिकाऱ्याच्या घरी भेट झाली आहे. या दोघांमध्ये तब्बल अर्धा तास चर्चा झाल्याचे सांगण्यात येत आहे. मात्र या भेटीसंदर्भात फडणवीस यांची प्रतिक्रीया आली आहे. अशोक चव्हाण आणि माझी कोणतीही भेट झाली नाही, असे स्पष्टीकरण देत, त्यांनी या भेटीचा दावा फेटाळून लावला आहे. ते आज पुण्यात आले होते. यावेळी त्यांनी पत्रकारांशी संवाद साधला.

फडणवीस म्हणाले, अशोक चव्हाण आणि माझी भेट झालेली नाही. आम्ही गणपती निमित्त एका कार्यक्रमाच्या ठिकाणी एकत्र आलो होतो. आमच्यात कसलीही चर्चा झाली नाही. तसेच मी पालकमंत्री म्हणून पुण्याला येणार नाही. पुण्यातून लोकसभाही मी लढवणार नाही, असे त्यांनी स्पष्ट केले. आज पुण्यात पीएमपी इलेक्ट्रीक बसेस आणि चार्जिंग स्टेशन्सच्या उद्धाटनाच्या कार्यक्रम पार पडले. या कार्यक्रमाला फडणवीस उपस्थित होते.

दरम्यान काल (१ सप्टेंबर) भाजप आणि शिंदे गटात समन्वयासाठी नियुक्त करण्यात आलेले भाजपचे पदाधिकारी आशिष कुलकर्णी यांच्या घरी अशोक चव्हाण आणि देवेंद्र फडणवीस यांची भेट झाली आहे. फडणवीस हे कुलकर्णी यांच्या घरी गणपतीच्या दर्शनासाठी गेले हेाते. नेमके त्याचवेळी माजी मुख्यमंत्री अशोक चव्हाण त्या ठिकाणी गेले हेाते. त्यावेळी या दोन्ही नेत्यांमध्ये सुमारे अर्धा तास चर्चा झाल्याची माहिती खात्रीलायक सूत्रांकडून मिळाली आहे. विशेष म्हणजे ही चर्चा राजकीय असल्याचे सांगण्यात येत आहे.