दिलीप वळसे पाटलांची बाजी : जिल्हा बँकेत पहिले मंत्री बिनविरोध

पुणे : राज्याचे गृहमंत्री दिलीप वळसे पाटील (Dilip Walse patil) यांची पुणे जिल्हा बँकेच्या संचालकपदी बिनविरोध निवड झाली आहे. आंबेगाव सोसायटी मतदारसंघातून त्यांची बिनविरोध निवड झाली आहे. काल उमेदवारी अर्ज दाखल करण्याचा शेवटचा दिवस होता. त्यांचा एकमेव अर्ज दाखल झाल्याने त्यांच्या विजयाची केवळ औपचारिक घोषणा होणे बाकी आहे. त्यांच्या गटात ५७ मतदार होते.

या सगळ्या घडामोडींमुळे यंदाच्या हंगामातील बिनविरोध निवडून जाणारे दिलीप वळसे पाटील पहिले मंत्री ठरले आहेत. ते जवळपास १९९१ पासून जिल्हा बँकेवर संचालक म्हणून कार्यरत आहेत. उपमुख्यमंत्री अजित पवार (Ajit Pawar) आणि राज्यमंत्री दत्तात्रय भरणे (Dattatray Bharne) हे देखील जिल्हा बँकेच्या रिंगणात आहेत

उमेदवारी अर्ज दाखल करण्यास २९ नोव्हेंबरपासून सुरुवात झाली असून मुदत ६ डिसेंबरपर्यंत होती. अर्जांची छाननी ७ तारखेला होऊन २२ डिसेंबरपर्यंत उमेदवारी अर्ज माघारी घेण्याची मुदत आहे. २३ डिसेंबर रोजी अंतिम यादी प्रसिद्ध होणार असून २ जानेवारी २०२२ रोजी मतदान व ४ जानेवारी रोजी मतमोजणी होणार आहे.

दत्तात्रय भरणे (Dattatrya Bharne) यांनी बुधवारी (ता. १ डिसेंबर) ‘ब ’ वर्गातून उमेदवारी अर्ज दाखल केला आहे. मागील २५ वर्षांपासून ते बँकेचे संचालक आहेत. त्यानंतर अजित पवार यांनीही 'अ' वर्गातून बारामती तालुक्यातून दोन उमेदवारी अर्ज त्यांच्या सूचकांमार्फत गुरुवारी (ता. २ डिसेंबर) दाखल केले आहेत. दिलीप वळसे पाटील यांनी ३ डिसेंबरला अर्ज दाखल केला होता.