Dipti Chaudhari Death: महत्वाची घडामोड! फरार सासरा, दीर किती दिवस पळणार? पोलिसांनी लावला सापळा; कोर्टाचा पती, सासुला दणका

सुनील जगताप, सकाळ वृत्तसेवा

Dipti Magar Chaudhari Death: नातू हवा म्हणून सुनेचा गर्भपात घडवून आणणाऱ्या आणि हुंड्यासाठी शारिरीक छळ करुन आत्महत्येस प्रवृत्त केल्याप्रकरणी सोरतापवाडीच्या (उरुळी कांचन) सरपंच सुनिता चौधरी यांच्यासह मुलगा रोहन चौधरी याला रविवार (दि. २६) पोलिसांनी अटक केली. त्यानंतर त्यांना प्रथमवर्ग न्यायदंडाधिकारी यांच्यासमोर हजर केल्यानंतर कोर्टानं त्यांना ३१ जानेवारीपर्यंत ६ दिवसांची पोलिस कोठडी सुनावली आहे. तर मृत दीप्तीचा दीर आणि सासरा मात्र अद्यापही फरार आहेत.

सासरच्या मंडळींकडून सततच्या पैशांची मागणी आणि मानसिक छळाला कंटाळून सोरतापवाडी येथील विवाहिता दिप्ती रोहन चौधरी यांनी शनिवार (दि.२५) गळफास घेऊन आत्महत्या केल्याचे प्रकरण उघड झाल्यानंतर, फरार झालेली सासू तथा सोरतापवाडीच्या सरपंच सुनिता चौधरी, पती रोहन कारभारी चौधरी यांना पोलिसांनी दुसऱ्याच दिवशी रविवारी (दि.२६) सकाळी अटक केली. या प्रकरणात सासू सुनिता चौधरी या मुख्य आरोपी असून सासरे कारभारी चौधरी व दीर रोहित चौधरी हे अद्याप फरार आहेत. पुणे ग्रामीण पोलिसांचे एक व उरुळी कांचन पोलिसांचे एक अशी दोन स्वतंत्र पथकं आरोपींच्या मागावर आहेत.

दिप्ती चौधरी यांच्या आत्महत्या प्रकरणी उरुळी कांचन पोलिसांत हुंडाबळी, शारीरिक छळ तसेच स्त्रीभ्रूणहत्या अशा गंभीर गुन्ह्यासाठी विविध कलमाअंतर्गत गुन्हे दाखल झाले आहेत. उरुळी कांचन पोलिसांनी या दोघांना प्रथमवर्ग न्यायदंडाधिकारी न्यायालयात आरोपींना हजर केले असता न्यायालयाने आरोपींना ६ दिवसांची पोलिस कोठडी सुनावली. दरम्यान, दिप्ती चौधरी यांच्या आत्महत्या प्रकरणी परिसरात तसेच समाजात संतप्त भावना पसरल्या आहेत. आरोपी हे गर्भ श्रीमंत असताना व सुशिक्षित कुटुंबात असताना दिप्तीला अडीच वर्षांच्या मुलीला मागे सोडून मृत्यूस कवटाळावे लागल्याने संतापाचा उद्रेक वाढला आहे. या गुन्ह्यात गर्भपात झाल्याने गर्भलिंग निदान करण्यास प्रतिबंध असताना संबंधीत गर्भलिंग निदानाचे रॅकेट शोधून संबंधीत रुग्णालयावर व व्यावसायिकांची पाळेमुळे शोधून काढण्याचे आव्हान पोलिसांपुढे आहे.