शिवसैनिक गुंडच; पण... : विजय शिवतारेंचे विधान

इंदापूर (जि. पुणे) : बाळासाहेब ठाकरेंचे (Balasaheb Thackeray) बंगले-इमारती यांचे वारस उद्धव ठाकरे (Uddhav Thackeray) असतील. पण, बाळासाहेबांच्या विचारांचे खरे वारस हे एकनाथ शिंदे (Eknath shinde) व बाळासाहेबांच्या शिवसेनेचे शिवसैनिक आहेत, असा दावा माजी मंत्री विजय शिवतारे (Vijay shitare) यांनी केला. ‘बाळासाहेब ठाकरे नेहमी म्हणायचे ‘शिवसैनिक (shivsainik) गुंडच आहेत; पण जनतेच्या हितासाठी.’ याची आठवण करून देत शिवतारे यांनी कार्यकर्त्यांना विरोधकांच्या आरोपांना जशास तसे उत्तर देण्याचे आवाहन केले. (Eknath Shinde is the true heir of Balasaheb Thackeray's thoughts: Vijay Shivtare)

इंदापूर येथील शासकीय विश्रामगृहात बाळासाहेबांची शिवसेना पक्षाच्या विस्तार वाढीसाठी व आगामी स्थानिक स्वराज्य संस्था निवडणुकाच्या आढावा बैठकप्रसंगी शिवतारे बोलत होते. यावेळी शिंदे गटाचे तालुकाध्यक्ष सुदर्शन साखरे, अशोक देवकर, भाजपचे ओबीसी सेलचे तालुकाध्यक्ष पांडुरंग शिंदे, सुरेंद्र जेवरे यांच्यासह मान्यवर उपस्थित होते.

शिवतारे म्हणाले की, पुणे जिल्ह्यात फक्त पवारांची शक्ती आहे, असे नाही. आता माझ्यासह हर्षवर्धन पाटील, भीमराव तापकीर, राहुल कुल, शिवाजीराव आढळराव पाटील, श्रीरंग बारणे यांच्या माध्यमातून शिवसेना-भाजपचीही शक्ती तयार झाली आहे. यातूनच आगामी निवडणुकांमध्ये कोणत्याही परिस्थितीत बारामतीत सेना-भाजपचाच खासदार निवडून येईल.

ज्यांच्याशी आम्ही लढलो, त्यांच्या मांडीला मांडी लावून उद्धव ठाकरे यांनी सत्ता स्थापन केली आणि सरकार असतानाही सेनेच्या कार्यकर्त्यांना त्रास दिला गेला. शिवसेनेचे खच्चीकरण करण्यात आले आणि शिवसेना संपवण्याचे प्रयत्न राष्ट्रवादीने केले, असा आरोपही त्यांनी केला.

महाविकास आघाडीचे सरकार अजून राहिले असते तर शिवसेनेसह लोकांचेही वाटोळे झाले असते; म्हणून एकनाथ शिंदे यांच्या नेतृत्वाखाली क्रांती करीत भाजपबरोबर सरकार स्थापन करण्यात आले. शिंदे-फडणवीस सरकार आता सर्वसामान्य लोकांचे सरकार म्हणून काम करत आहे आणि पुढचा काळ हा शिवसेना-भाजपसाठी उज्वल असेल असा, विश्वासही शिवतारे यांनी व्यक्त केला.

बंडखोरी नव्हे क्रांती..

एकनाथ शिंदे यांनी बंडखोरी केली म्हणून ठाकरे गट ओरडत आहे. शिंदेंनी बंडखोरी नाही, तर त्यांना चाळीस आमदारांसह माझ्यासारख्या ५२ माजी आमदारांनी होणाऱ्या अन्यायाचा पाढा वाचून दाखवत गळ घातली आणि त्यातूनच क्रांती झाली, असे सांगत गद्दार म्हणणाऱ्यांना शिवतारे यांनी टोला लगावला.