अशोक पवार-निवृत्तीअण्णा गवारेंच्या लढाईत आता पाचर्णेंची एंट्री

शिक्रापूर (जि. पुणे) : पुणे जिल्हा मध्यवर्ती सहकारी बॅंकेच्या निवडणुकीत राष्ट्रवादीचे (NCP) आमदार अशोक पवार (Ashok Pawar) विरुद्ध ज्येष्ठ संचालक निवृतीअण्णा गवारे अशी निवडणूक होण्याची चिन्हे असतानाच सोमवारी (ता. ६ डिसेंबर) शिरुर-हवेलीतील चौघांनी अर्ज भरून निवडणुकीत रंगत आणली आहे. विशेष म्हणजे ज्या मतदार संघात आमदार पवार, संचालक गवारे आहेत, त्याच अ वर्ग मतदार संघात भाजपचे (BJP) माजी आमदार बाबूराव पाचर्णे यांचे चिरंजीव राहुल पाचर्णे यांनी अर्ज भरल्याने निवडणुकीत ट्विस्ट आला आहे. याशिवाय जिल्हा परिषदेचे माजी अध्यक्ष प्रदीप कंद, शिरूर आणि हवेलीचे भाजप तालुकाध्यक्ष दादापाटील फराटे व रोहिदास उंद्रे यांनीही इतर गटांतून अर्ज भरून राष्ट्रवादीच्या राजकारणाला शह देण्याचा प्रयत्न केला आहे. (Four BJP candidates from Shirur-Haveli have filed applications for Pune District Bank)

पुणे जिल्हा मध्यवर्ती सहकारी बॅंकेच्या पंचवार्षिक निवडणुकीत शिरुर-हवेलीतून आमदार अशोक पवार यांच्या विरोधात ज्येष्ठ संचालक निवृत्तीअण्णा गवारे अशी निवडणूक होण्याची चर्चा रंगली होती. मात्र, अर्ज भरण्याच्या शेवटच्या दिवशी भाजपच्या चौघांनी अर्ज भरले आहेत. अ वर्ग मतदार संघातून आता आमदार पवार, गवारे आणि पाचर्णे, उंद्रे अशी लढत होण्याची शक्यता आहे. त्यासाठी माघारीपर्यंत वाट पाहावी लागणार आहे. याशिवाय प्रदीप कंद, दादापाटील फराटे, रोहिदास उंद्रे यांनी अर्ज भरल्याने निवडणुकीला रंगत येणार, हे मात्र निश्चित.

शिरुरमधून भाजपचे तालुकाध्यक्ष दादापाटील फराटे यांनी ड वर्ग मतदार संघातून, तर हवेलीचे भाजपचे माजी तालुकाध्यक्ष रोहिदास उंद्रे यांनीही अ वर्ग सोसायटी मतदार संघातून, तर क वर्ग प्रतिनिधी मतदार संघातून जिल्हा परिषदेचे माजी अध्यक्ष प्रदीप कंद यांनी अर्ज दाखल केल आहेत. प्रदीप कंद हे प्रथमच सहकार क्षेत्रातील निवडणुकीत उतरले आहेत.

दरम्यान, भाजप उमेदवारांचे अर्ज भरण्यासाठी दौंडचे आमदार राहुल कुल, माजी आमदार बाळा भेगडे, जिल्हाध्यक्ष गणेश भेगडे, धर्मेद्र खांडरे, हवेली भाजपा तालुकाध्यक्ष संदीप भोंडवे, राजेंद्र कोरेकर, सुभाष जगताप, भगवान शेळके, आबा सोनवणे, कैलास सोनवणे, सचिन शेलार, काका खळदकर, आत्माराम फराटे, रवींद्र कंद, दादासाहेब सातव, विजय भोस, संतोष पवळे, माऊली बहिरट, राजेंद्र वाघमारे, शिवाजी वाळके, दत्ता वाळके आदींसह असंख्य भाजप पदाधिकारी उपस्थित होते.