Baramati News : बारामतीतील 'त्या' अधिकाऱ्याला सरकारचा दिलासा, पण धाडले थेट हजार किमी दूर...

Anantrao Pawar ITI update : बारामती तालुक्यातील माळेगाव येथील अनंतराव पवार शासकीय औद्योगिक प्रशिक्षण संस्थेचे निलंबित तत्कालीन उपप्राचार्य व प्राचार्य (अतिरिक्त कार्यभार) अवधुत जाधवर यांना पुन्हा सेवेत घेण्याचा निर्णय सरकारने घेतला आहे. जाधवर यांना मागील वर्षी ४० हजार रुपयांची लाच घेताना लाचलुचपत प्रतिबंधक विभागाने रंगेहाथ पकडले होते.

बारामतीतील एका नामांकित हॉटेलजवळ ही कारवाई झाली होती. त्यानंतर दुसऱ्याच दिवशी म्हणजे २५ जूनला जाधवर यांना निलंबित करण्यात आले होते. तर सप्टेंबर महिन्यांत त्यांची विभागीय चौकशी सुरू करण्यात आली होती. निलंबित आढावा समितीने १४ जानेवारीला झालेल्या बैठकीत अवधुत जाधवर यांच्याबाबत महत्वाचा निर्णय घेतला आहे.

समितीने जाधवर यांना सेवेत पुन:स्थापित करण्याची शिफारस केली आहे. ही शिफारस सरकारनेही मान्य केली आहे. त्यानुसार त्यांचे त्यांच्याविरोधातील फौजदारी खटल्यातील निर्णयाच्या व विभागीय चौकशीच्या अंतिम निर्णयाच्या अधीन राहून निलंबन संपुष्टात आणून शासन सेवेत पुन:स्थापित करण्यात येत आहे, असा जीआर सरकारने काढला आहे.     

जाधवर यांना पुन्हा शासन सेवेत घेताना सरकारने त्यांना थेट गडचिरोलीला धाडले आहे. तेथील क्रांतिवीर बाबुराव शेडमाके शासकीय औद्योगिक प्रशिक्षण संस्थेमध्ये (आदिवासी) उपप्राचार्य पदावर त्यांची नियुक्ती करण्यात आली आहे. कौशल्य, रोजगार, उद्योजकता व नाविन्यता विभागाने हा शासन निर्णय जारी केला आहे.

नेमकं काय आहे प्रकरण?

एका खासगी पॅरामेडिकल संस्थेच्या अध्यक्षांनी लाचलुचपत प्रतिबंधक विभागाकडे जाधवर यांच्याविरोधात तक्रार केली होती. संस्थेतील परीक्षांसाठी शासकीय पर्यवेक्षकसाठी तक्रारदाराने आयटीआयकडे विनंती केली होती. जाधवर यांनी या नेमणुकीसाठी प्रतिविद्यार्थी दोन हजार रुपये याप्रमाणे ९० हजार रुपयांची मागणी केली होती.

याबाबत तक्रारदाराने एसीबीकडे तक्रार केल्यानंतर जाधवर यांना ४० हजार रुपयांची लाच घेताना रंगेहाथ पकडण्यात आले होते. बारामतीतील या कारवाई शिक्षण क्षेत्रात खळबळ उडाली होती. जाधवर हे आठ महिने निलंबित होते. आता त्यांना पुन्हा खटल्यातील निर्णय व विभागीय चौकशीच्या अंतिम निर्णयाच्या अधीन राहून सेवेत घेण्यात आले आहे.