Maharashtra Politics : 'मविआ'ला डावलून महायुतीविरोधात 'हे' तीन बडे नेते रान पेटवणार; 'स्थानिक'च्या निवडणुकीपूर्वी नवे राजकीय समीकरण जुळणार!

Pune News, 15 Apr : विधानसभा निवडणुकांमध्ये महाराष्ट्रात महायुतीला प्रचंड असं बहुमत मिळालं तर दुसरीकडे महाविकास आघाडीचा दारूण पराभव झाला. सध्या विधानसभेमध्ये महाविकास आघाडीकडून कोणत्याही पक्षाला विरोधी पक्षनेतापद देखील देण्यात आलेलं नाही.

त्यामुळे कुठंतरी विरोधकांची ताकद कमी झाल्याचं बोललं जात असतानाच विरोधकांची कमी झालेली स्पेस घेण्यासाठी महाराष्ट्रातील 3 मातब्बर नेते एकत्रित येणार आहेत. राज्याच्या राजकारणामध्ये महायुती, महाविकास आघाडीनंतर वंचित बहुजन आघाडीचा प्रयोग महाराष्ट्रातील राजकारणात पाहायला मिळाला.

नुकत्याच झालेल्या विधानसभा निवडणुकीत संभाजीराजे छत्रपती यांच्या पुढाकाराने बच्चू कडू आणि राजू शेट्टी यांच्यासोबत परिवर्तन महाशक्ती आघाडीचा प्रयोग देखील पाहायला मिळाला. अशातच आता लोकसभा आणि विधानसभेनंतर आगामी स्थानिक स्वराज्य संस्थांच्या निवडणुकांसाठी नवीन आघाडीचा प्रयोग पाहायला मिळणार आहे.

आता विरोधी पक्षांची स्पेस भरून काढण्याच्या निर्धाराने तीन बडे नेते एकत्र येणार आहेत. पुण्यामध्ये शेतकरी संघटनेचे नेते राजू शेट्टी, प्रहारचे बच्चू कडू आणि राष्ट्रीय समाज पक्षाचे महादेव जानकर यांची रविवारी एकत्रित 'युवा संघर्ष निर्धार परिषद होणार आहे.

'खोट्या आश्वासनांना कंटाळलेल्या तरुणांचा बुलंद निर्धार.!' या टॅगलाईन खाली "युवा संघर्ष निर्धार परिषद 2025" होणार आहे. या माध्यमातून आगामी स्थानिक स्वराज्य संस्थांच्या निवडणुकांसाठी एक वेगळं समीकरण महाराष्ट्रातील जनतेला पाहायला मिळणार असल्याचे सांगितले जात आहे.

त्यामुळे आगामी काळामध्ये हे तिन्ही नेते एकत्रित येत एक नवीन आघाडी तयार करणार असल्याचे बोलले जात आहे. याआधीही तिसऱ्या आघाडीचे प्रयोग अनेकदा झाले आहेत, परंतु त्याला यश आलेलं पाहायला मिळाले नाही.

त्यामुळे आता पुन्हा एकदा स्थानिक स्वराज्य संस्थांच्या निवडणुकीच्या पार्श्वभूमीवर होऊ घातलेल्या या समीकरणाला कशा पद्धतीने प्रतिसाद मिळणार हे पाहणं महत्त्वाचं ठरणार आहे.

२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप