Ajit Pawar News : मलाही एकदा बघायचंच आहे काय होतंय ते!" : अजित पवार यांनी थोपटले दंड

Ajit Pawar News : माळेगाव सहकारी साखर कारखान्याची निवडणूक आपण पूर्ण ताकदीनिशी लढणार आहोत. माझ्या पॅनेलमध्ये फक्त राष्ट्रवादी काँग्रेसचेच नाही तर जे संचालक होण्यास पात्र आहेत, असेही उमेदवार असतील. शिवाय 13 जून रोजी प्रचाराचा प्रारंभ करताना कारखान्याच्या अध्यक्षपदाच्या नावाचीही घोषणा केली जाणार आहे. तसेच मीही या निवडणुकीत लढणार आहे, मलाही एकदा बघायचंच आहे की काय होतंय ते, असे म्हणत त्यांनी या लढतीसाठी दंड थोपटले आहेत.

बारामती तालुक्यातील माळेगाव सहकारी साखर कारखान्याची पंचवार्षिक निवडणूक नुकतीच जाहीर झाली आहे. या पार्श्वभूमीवर राष्ट्रवादी काँग्रेसची भूमिका स्पष्ट करण्यासाठी गुरुवारी (22 मे) मेळाव्याचे आयोजन करण्यात आले होते.

अजित पवार म्हणाले, माझ्या हातात जे जे काही आहे, त्या सर्वच यंत्रणांचा वापर करत मी ही निवडणूक लढणार आहे. माझ्या पॅनेलमध्ये केवळ राष्ट्रवादीचेच उमेदवार नसतील तर जे योग्य असतील, संचालक होण्यासाठी पात्र असतील, ते उमेदवार असतील. बऱ्यापैकी नवीन चेहऱ्यांना संधी देणार आहे. शिवाय या निवडणुकीत मीही लढणार आहे, मलाही एकदा बघायचंच आहे की काय होतंय ते, असे म्हणत त्यांनी ही निवडणूक कमालीची प्रतिष्ठेची केली आहे.

अध्यक्ष व संचालकांना चुकीचे काम करू देणार नाही. संचालकांना कारखान्याची गाडी वापरू देणार नाही, ज्यांना हे पटणार नाही त्यांनी पॅनेलमध्ये येऊच नका. काही जण माझ्या मागे उद्योग करतात आणि बदनामी माझी होते. त्यामुळे मीच बारकाईने लक्ष घालणार आहे, असे म्हणत अजित पवार यांनी संचालक आणि अध्यक्ष होऊ इच्छिणाऱ्यांनाही दम भरला. तसेच कारखाना कार्यक्षेत्रातील विकासकामांनाही चालना देणार असून, सीएसआरच्या माध्यमातूनही काही विकासकामे मार्गी लावली जातील, असे आश्वासनही दिले.