Vanchit Bahujan Aaghadi: मावळमध्ये ‘आघाडी’त बिघाडी; 'वंचित'च्या तालुकाध्यक्षांचं तडकाफडकी निलंबन,कारणही आलं समोर

विजय सुराणा-

Pune News: महाविकास आघाडीसह महायुतीमध्ये स्थानिक स्वराज्य संस्थेच्या निवडणुकीत जोरदार रस्सीखेच असणार आहे. पण या निवडणुका स्वबळावर लढायच्या की युती-आघाडीसह याबाबत अद्याप अजून कोणत्याच पक्षामध्ये एकमत झालेले दिसत नाही. सर्वच पक्षांनी स्थानिक पातळीवरील नेत्यांवर ही जबाबदारी टाकल्याचे चित्र आहे. दुसरीकडे वंचित बहुजन आघाडीची साथ कोणत्याही पक्षाला नको असल्याचे चित्र दिसून येत आहे. अशातच,आता वंचितमधून एक मोठी अपडेट समोर आली आहे.

वंचित पक्षाचे मावळ तालुकाध्यक्ष नितीन ओहळ यांना पक्षाने सहा महिन्यांसाठी निलंबित केले आहे. त्यांनी वरिष्ठांच्या निर्देशाशिवाय महाआघाडीत सहभागी झाल्याचा ठपका ठेवण्यात आला आहे. पक्षाचे राज्य सचिव प्रफुल्ल तेलंग यांनी याबाबत पत्रक काढले.

ओहळ म्हणाले, “वंचितच्या वरिष्ठांनी मावळात महाआघाडीत सहभागी न होता स्वतंत्र निवडणूक लढविण्याचे आदेश दिले होते. मात्र स्थानिक परिस्थिती लक्षात घेऊन आम्ही आघाडीत सामील झालो. परवानगी न घेतल्यामुळे माझे निलंबन करण्यात आले आहे.”

आंबेडकरांची सोशल मीडियावरील पोस्ट चर्चेत

या घडामोडीमुळे मावळातील महाआघाडीत पहिल्याच दिवशी बिघाडी निर्माण झाली असून पुढील राजकीय समीकरणांवर याचा परिणाम दिसून येण्याची शक्यता आहे. प्रकाश आंबेडकर यांनी मध्यंतरी सोशल मीडियावर पोस्ट केली होती. यात त्यांनी स्थानिक स्वराज्य संस्थांच्या निवडणुका आम्ही लढवणार आहोत. स्थानिक पातळीवर युतीचे अधिकार जिल्हा कमिटीला देण्यात आले आहेत. जिल्ह्यात भाजपला सोडून युती करण्यास हरकत नाही. याबाबत महाराष्ट्र कमिटी निर्णय घेईल, असे आंबेडकरांनी स्पष्ट केले होते.

आंबेडकर पोस्टमध्ये म्हणतात, आजपर्यंत काँग्रेस किंवा इतर कोणत्याही पक्षाने वंचित बहुजन आघाडीशी युतीसाठी संपर्क साधलेला नाही, अशी माहितीही आंबेडकरांनी पोस्टमध्ये दिली आहे. भाजपने काँग्रेसला वंचित बहुजन आघाडीशी युती करू नये, असे सांगितले आहे का? भाजपकडे काँग्रेसविषयी असं काय आहे, ज्यामुळे काँग्रेस भाजपला घाबरत आहे?, असा सवाही आंबेडकरांनी केला आहे.

मागील वर्षी पार पडलेल्या लोकसभा निवडणुकीदरम्यानही वंचित आणि महाविकास आघाडीमध्ये बोलणी सुरू झाली होती. पण अखेरच्या क्षणी बोलणी फिस्कटली. विधानसभेतही आघाडी होऊ शकली नाही. आता आंबेडकरांनी पुन्हा एकदा स्थानिक स्वराज्य संस्थेच्या निवडणुकीत आघाडीसाठी हात पुढे केला आहे.