चर्चांना उधाण! महाआरतीनंतर आता मनसेच्या वसंत मोरेंची ईदच्या मेजवानीला हजेरी

पुणे : महाराष्ट्र नवनिर्माण सेनेचे (MNS) अध्यक्ष राज ठाकरे (Raj Thackeray) यांनी मशिदीवरील भोंगे काढण्याबाबत आंदोलन पुकारले आहे. या आंदोलनात मनसेचे माजी पुणे शहर शहराध्यक्ष वसंत मोरे (Vasant More) कुठेच दिसले नव्हते. मात्र, अखेर वसंत मोरे यांनी शनिवारी कात्रज गावठाण येथील हनुमान मंदिरात महाआरती आयोजित केली होती. यानंतर आता वसंत मोरेंनी ईद साजरी करून सगळ्यांनाच धक्का दिला आहे.

वसंत मोरे यांनी त्यांच्या फेसबुक पेजवर ईद साजरी केल्याची छायाचित्रे पोस्ट केली आहेत. मनसेच्या मुस्लिम पदाधिकऱ्याच्या घरी जाऊन ते मेजवानीत सहभागी झाले होते. मनसेचे वाहतूक सेनेने शहर सरचिटणीस आवेज भाई शेख यांच्या घरी ही मेजवानी झाली. याबाबत मोरेंनी फेसबुक पोस्टमध्ये म्हटले आहे की, महाराष्ट्र नवनिर्माण वाहतूक सेनेचे पुणे शहर सरचिटणीस आवेजभाई शेख यांचे घरी जेवण केले. सोबत सुनील अंधारे (पाटील) पुणे शहर वाहतूक उपाध्यक्ष, शाखा अध्यक्ष अमितआण्णा जगताप, शाखा अध्यक्ष मंगेश रासकर होते. परिसरातील बरेच नागरिकही उपस्थित होते.

दरम्यान, राज ठाकरे हे शनिवारी (ता.7) पुणे दौऱ्यावर होते. असे असताना ते मोरे यांच्या महाआरतीच्या कार्यक्रमाला ते उपस्थित राहू शकले नाहीत. त्यामुळे राजकीय वर्तुळात चर्चांना उधाण आले होते. त्यानंतर काल (ता.8) वसंत मोरे यांनी राज ठाकरे यांची भेट घेतली होती. राज ठाकरे यांच्या पुण्यातील निवासस्थान असलेल्या राजमहाल याठिकाणी ही भेट झाली होती.

या भेटीनंतर मोरे यांनी माध्यमांशी संवाद साधला होता. मोरे म्हणाले होते की, राजसाहेब काल पुण्यात येणार असल्याचे मला माहीत नव्हते. प्रसारमाध्यमांमुळेच साहेब पुण्यात येणार असल्याची माहिती मिळाली. मात्र, त्यापूर्वीच मी महाआरतीचे आयोजन केले होते. त्याबद्दल राज ठाकरे यांना मेसेज करून कळवले होते. महाआरतीला नागरिकांनी प्रचंड गर्दी केली होती. महाआरतीनंतर आज राज साहेबांची भेट घेतली.