सातारा दौऱ्यात पवारांचं प्रचंड स्वागत; दीडशे वाहनांचा ताफा, यशवंतरावांच्या समाधीला अभिवादन !

Pune News : राष्ट्रवादीतील फुटीनंतर राष्ट्रवादी काँग्रेस (NCP) पक्षाचे अध्यक्ष शरद पवार (Sharad Pawar) आज (सोमवारी) कराडच्या दिशेने रवाना झाले आहेत.त्यांच्यासोबत खासदार सुप्रिया सुळे, वंदना चव्हाण, आमदार रोहित पवार हे आहेत.

कराड (Karad) येथे ते यशवंतराव चव्हाण यांच्या समाधीचे दर्शन घेतील आणि पुन्हा एकदा आपल्या राजकीय वाटचाल आणि भूमिकांचा श्रीगणेशा करतील. पुणे शहर राष्ट्रवादी काँग्रेसच्यावतीने सुरुवातीला सकाळी त्यांचं स्वागत करण्यात आले. त्यानंतर पवार यांचा गाड्याचा ताफा सातारकडे रवाना झाला.

पवार यांच्याबरोबर सुमारे सव्वाशे ते दीडशे गाड्यांचा ताफा आहे. रस्त्यात जागोजागी त्यांचे प्रचंड स्वागत होत आहे. शिवापूर,कापूरहोळ शिरवळ,आनेवाडी आणि सातारा या ठिकाणी पवार यांचे प्रचंड मोठ्या गर्दीने स्वागत केलं.

रविवारी राष्ट्रवादी काँग्रेसचे नेते अजित पवार आणि काही नेत्यांनी भाजपसोबत जाण्याचा निर्णय घेतला. अजित पवार यांनी उपमुख्यमंत्री पदाची शपथ घेतल्यामुळे राष्ट्रवादी काँग्रेसमध्ये हालचालीना वेग आलं.

अवघ्या दोन तासात राष्ट्रवादी काँग्रेसचे अध्यक्ष शरद पवार यांनी आमदार जितेंद्र आव्हाड यांची विरोधी पक्षनेतेपदी आणि पक्षाच्या मुख्य प्रतोदपदी वर्णी लावली.

अजित पवार यांना या बंडात पाठिंबा असणाऱ्या पक्षाच्या आमदारांची संख्या अजूनही गुलदस्त्यात आहे. काल (रविवारी) सकाळी ‘देवगिरी’ या अजित पवार यांच्या निवासस्थानी झालेल्या बैठकीला राष्ट्रवादीचे ३५ आमदार उपस्थित होते, असा दावा त्यांच्या समर्थकांकडून केला जात आहे.