Rohit Pawar: हाकेंची चूक नाही, सत्ताधारीच त्यांना तसं बोलायला सांगतात; राष्ट्रवादीवरील टीकेवर रोहित पवारांची प्रतिक्रिया

Pune News : राष्ट्रवादीच्या स्थापनेनंतर पहिल्यांदाच पुण्यामध्ये पक्षाचा वर्धापन दिन साजरा होत आहे. दोन्ही राष्ट्रवादीच्या विलीनीकरणाबाबत चर्चा सुरू असतानाच दोन्ही राष्ट्रवादी वेगवेगळ्या ठिकाणी शहरांमध्ये आपला वर्धापन दिन साजरा करीत आहेत.

वर्धापन दिन कार्यक्रमाच्या निमित्ताने दोन्ही राष्ट्रवादीमध्ये स्पर्धा सुरू असताना याबाबत राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी टीकात्मक वक्तव्य केले आहे. ओबीसी नेते लक्ष्मण हाके यांच्याकडून करण्यात येणाऱ्या टीकेबाबत देखील रोहित पवारांनी सकारात्मक प्रतिक्रिया दिली.

पुण्यामध्ये माध्यमांशी बोलताना रोहित पवार म्हणाले की राष्ट्रवादी काँग्रेस हा पक्ष लोकांच्या आणि जनतेच्या हितासाठी लढत आलेला आहे. त्यातील बराचसा काळा हा सत्तेत गेला आहे तर काही काळ विरोधामध्ये गेला आहे. आणि सध्या राष्ट्रवादी काँग्रेस विरोधात आहे. लोकांच्या हितासाठी संघर्ष ,करण्या बाबतच मार्गदर्शन यापूर्वीही शरद पवार हे करत आलेले आहेत. आजही ते त्याच पद्धतीचे मार्गदर्शन करतील.

दोन्ही राष्ट्रवादीकडून होत असलेल्या वर्धापन दिनाच्या कार्यक्रमाबाबत बोलताना रोहित पवार म्हणाले, "अजित पवारांच्या राष्ट्रवादीचा होणारा कार्यक्रम हा वेगळा आहे. त्यांचा पक्ष वेगळा आहे. जेव्हा 1999 ला राष्ट्रवादी काँग्रेसची स्थापना झाली तेव्हा या पक्षाचे प्रमुख हे शरद पवार होते आणि आताही ते आमच्या पक्षाचे प्रमुख तेच आहेत. अजित पवारांच्या राष्ट्रवादीकडून त्यांच्या स्टाईलप्रमाणे मोठ्या प्रमाणात शक्ती प्रदर्शन करून वर्धापन दिन साजरा करण्यात येत आहे. मात्र शरद पवार हे नेहमी सांगतात की पक्ष हा एक कुटुंब आहे, त्याचा कार्यक्रम देखील कुटुंबाप्रमाणे व्हायला हवा, त्यामुळे शक्ती प्रदर्शन करण्यापेक्षा प्रेमानं लोक आमच्या वर्धापन दिनाच्या कार्यक्रमाला येत असतात,"

ओबीसी नेते लक्ष्मण हाके यांच्याकडून सातत्याने राष्ट्रवादी काँग्रेसवर करण्यात येणाऱ्या टीकेबाबत बोलताना रोहित पवार म्हणाले की लक्ष्मण हाके जी टीका करतात त्यामध्ये त्यांची चूक नाही. सत्तेत असलेली मोठी लोकं त्यांना तसं बोलायला सांगत आहेत. जातीवाद, धर्मवाद राहिला पाहिजे, असं सत्तेतील काही मोठ्या लोकांना वाटतं. सत्तेत असलेल्या मोठा लोकांना हे बोलता येत नाही. त्यामुळे सामान्य कुटुंबातील लक्ष्मण हाके यांच्यासारख्या लोकांचा वापर त्या ठिकाणी केला जातो . त्यामुळे ते कोणाच्यातरी सांगण्यावरून बोलताय त्यामुळे या बाबतीत जास्त वेळ घालवणं योग्य नाही असं रोहित पवार म्हणाले.