`वैशाली नागवडेंना लगावलेली थप्पड भाजपला महागात पडणार`

मुंबई : ‘‘भाजपच्या कार्यकर्त्यांनी राष्ट्रवादी काँग्रेसच्या महिला कार्यकर्त्यांना धक्काबुक्की केली, त्यांना मारहाण केली. (BJP workers misbehave with women NCP leaders in Pune ) या घटनेचा धिक्कार असून, भाजपच्या पुरुष पदाधिकाऱ्याने राष्ट्रवादी काँग्रेसच्या महिला पदाधिकारी यांना थप्पड लगावली आहेच, पण ही थप्पड महागाईचा सामना करणाऱ्या राज्यातील तमाम महिला वर्गाला लागलेली आहे,’’ अशी टीका राष्ट्रवादी महिला काँग्रेसच्या प्रदेशाध्यक्ष विद्या चव्हाण यांनी मंगळवारी केली. (NCP leader Vidya Chavan slams BJP)

त्या म्हणाल्या, ‘‘केंद्रीय मंत्री स्मृती इराणी (Smruti Irani) पुण्यात आलेल्या असताना त्यांना महागाईबाबतचे निवेदन देण्यासाठी राष्ट्रवादी महिला काँग्रेसच्या पश्चिम महाराष्ट्र विभागीय अध्यक्ष वैशाली नागवडे गेल्या होत्या. लोकशाही मार्गाने निवेदन द्यायला गेलेल्या ‘राष्ट्रवादी’ महिला पदाधिकाऱ्यांना भाजपच्या कार्यकर्त्यांनी धक्काबुक्की केली, त्यांचा विनयभंग करत श्रीमुखात भडकावली. या घटनेचा निषेध करत असताना विद्या चव्हाण म्हणाल्या की, महागाईबाबत बोलणे चूक आहे का, एकेकाळी तुम्हीच महागाईवर आकाशपाताळ एक केले होते, मग आज महागाईबाबतचे निवेदन तुम्हाला का नको? भाजपला याचा हिशोब द्यायला लागेल.’’

भाजपला जाब विचारू
भाजपने माफी मागितली नाही, तर राज्यात प्रत्येक ठिकाणी महागाईवर भाजपला जाब विचारला जाईल, असा इशारा चव्हाण यांनी दिला. पंतप्रधान नरेंद्र मोदी यांनी २०१४ मध्ये महागाई कमी करण्याचे स्वप्न दाखवून सत्ता हस्तगत केली. पण आता महागाई आकाशाला भिडली असताना मोदी आणि भाजप गप्प आहे. उलट सदाभाऊ खोत यांच्यासारखे नेते कुठे आहे महागाई, असा निर्लज्ज प्रश्न विचारत आहेत, अशा अशी टीकाही विद्या चव्हाण यांनी यावेळी केली.