Rohit Pawar : मंदिर व्यवस्थापनाच्या अभ्यासक्रमावर शरद पवारांच्या पक्षाने घेतला आक्षेप!

Pune News : सावित्रीबाई फुले पुणे विद्यापीठ लवकरच मंदिर व्यवस्थापन हा अभ्यासक्रम सुरू करणार आहे. विद्यापीठाचा हा ‘मंदिर व्यवस्थापन’ अभ्यासक्रम वादाच्या भोवऱ्यात सापडण्याची शक्यता आहे.

या अभ्यासक्रमाबाबत राष्ट्रवादी काँग्रेस पार्टी शरदचंद्र पवार पक्षाकडून आक्षेप घेण्यात आला आहे.

राष्ट्रवादी काँग्रेस (NCP) पार्टी शरदचंद्र पवार पक्षाचे आमदार रोहित पवार यांनी याबाबत राज्य सरकारला विनंती केली आहे. सावित्रीबाई फुले पुणे विद्यापीठाने ‘मंदिर व्यवस्थापन’ या विषयाचा अभ्यासक्रम सुरू करण्याऐवजी कायम दुर्लक्षित ठेवलेल्या पैठण येथील संतपीठाला भरीव निधीच्या माध्यमातून उर्जितावस्था द्यावी. आणि त्यांच्या अखत्यारित हा विषय सुरू केला तर, ते अधिक योग्य ठरेल रोहित पवार यांचे म्हणणं आहे.

रोहित पवार यांनी याबाबत एक पोस्ट केली आहे. पोस्टमध्ये रोहित पवार म्हणाले, "सावित्रीबाई फुले पुणे (PUNE) विद्यापीठाने ‘मंदिर व्यवस्थापन’ या विषयाचा अभ्यासक्रम सुरू करण्याऐवजी कायम दुर्लक्षित ठेवलेल्या पैठण येथील संतपीठाला भरीव निधी द्यावा. उर्जितावस्था देऊन त्यांच्या अखत्यारित हा विषय सुरू केला तर ते अधिक योग्य ठरेल".

इतर विद्यापीठांनी मात्र आपल्या कार्यकक्षेबाहेरील विषयांत नाक खुपसण्यापेक्षा ढासळणारी गुणवत्ता सुधारण्यासाठी प्रयत्न करावेत. युवा पिढी जगाच्या स्पर्धेत टिकण्यासाठी 'डाटा सायन्स', 'नॅनो टेक्नॉलॉजी', 'एआय' यासांरखे बदलत्या तंत्रज्ञानाधारीत अभ्यासक्रम सुरू करून विद्यापीठातून बाहेर पडणारी पिढी ही बेरोजगार न राहता त्यांना नोकऱ्या कशा मिळतील, याचा प्रयत्न करावा.

तसंच विद्यापीठाने आपलं काम करताना विज्ञान आणि अध्यात्म याची गल्लत करू नये. राज्य सरकार आणि कुलपती महोदयांनीही यामध्ये लक्ष घालावं, ही विनंती! असं रोहित पवार यांनी म्हटले आहे.