Gautami Patil: पुण्यातील अपघातप्रकरणी गौतमी पाटीलवर कारवाई होणार नाही! पुणे पोलिसांनी केलं स्पष्ट

Gautami Patil Pune Accident Case: पुण्यातल्या कार अपघातामुळं चर्चेत आलेली आणि राजकारणाचा निशाणा ठरलेली प्रसिद्ध नृत्यांगणा गौतमी पाटील हिच्यावर कारवाईसाठी भाजप आमदार आणि मंत्री चंद्रकांत पाटील यांनी थेट डीसीपींना फोन लावला होता. पण आता गौतमीवर या प्रकरणात कारवाई करता येणार नाही असं स्पष्टीकरण डीसीपी संभाजी कदम यांनी दिलं आहे. याबाबत कायदा काय सांगतो हे देखील त्यांनी सांगितलं आहे.

गौतमी कारवाई करता येणार नाही - पोलीस

डीसीपी संभाजी कदम यांनी सांगितलं की, "मोटार व्हेईकल कायद्यानुसार, अपघाताला कारणीभूत ठरलेल्या गाडीत बसलेल्या को-पॅसेंजरवर कारवाई करता येत नाही. कायद्यात केवळ चालक अपघाताला जबाबदार असल्यानं त्याच्यावर कारवाईची तरतूद आहे. त्यामुळं गौतमी पाटीलवर कुठलीही कारवाई करता येणार नाही. अपघातावेळी गौतमी पाटील गाडीत होती की नाही हे अद्याप स्पष्ट झालेलं नाही. याबाबतचा तपास सध्या पोलिसांकडून सुरु आहे. पण गौतमीनं गाडीची सर्व कागदपत्रे पोलिसांकडं जमा केली आहेत. तसंच गरज पडल्यास तिला चौकशीसाठी बोलावलं जाईल. पण अद्याप तिला चौकशीसाठी बोलावण्यात आलेलं नाही"

रिक्षा चालकाच्या कुटुंबियांचा आरोप

दरम्यान, अपघातात नुकसान झालेल्या आणि गंभीर जखमी झालेल्या रिक्षा चालकाच्या कुटुंबियांनी अपघातावेळी गाडीत गौतमी पाटील असण्याची केवळ शक्यता व्यक्त केली आहे. अपघातावेळी ते घटनास्थळी उपस्थित नव्हते. त्यामुळं पोलिसांनी रिक्षाचालक समाजी मरगळे यांच्या कुटुंबियांची गौतमी पाटीलवर कारवाईची मागणी फेटाळून लावली. तसंच कोथरुडचे आमदार चंद्रकांत पाटील यांनी देखील फोन करुन डीसीपींना गौतमी पाटीलला उचलणार आहात की नाही? अशा भाषेत आदेश दिले होते. पण कायद्यात हे बसत नसल्यानं पोलिसांनी त्यांच्या आदेशवजा सूचनेला बाजुला ठेवलं आहे.