Pune Police| मिरवणूक वेळेत संपवण्यासाठी आमचे प्रयत्न सुरु; पोलीस आयुक्तांचे स्पष्टीकरण

पुणे : पुणे शहरातील गणेश विसर्जन मिरवणूक २४ तासांनंतरही रेंगाळल्यामुळे विसर्जनास उशीर झाला आहे. पोलीस प्रशासन आणि मंडळामध्ये समन्वयाचा अभावामुळे मिरवणूक लांबल्याचे बोलले जात आहे. (Pune Ganpati Immersion Procession 2022)

याबाबत पुणे पोलिस आयुक्त अमिताभ गुप्ता यांनी स्पष्टीकरण दिले आहे. "पुणे शहरातील गणेशोत्सव विसर्जन मिरवणुकीतील ढोल ताशा पथकांमध्ये पडलेल्या अंतरामुळे विसर्जनासाठी वेळ लागत आहे. पोलिसांकडून सकाळपासून मंडळांना पुढे ढकलण्यात येत आहे. मिरवणूक वेळेत संपविण्यासाठी पोलीस प्रशासनाचा प्रयत्न सुरू आहे," असे पोलिस आयुक्त अमिताभ गुप्ता यांनी शनिवारी स्पष्ट केले.

"विसर्जन मिरवणूक वेळेत संपविण्यासाठी आमचे प्रयत्न सुरू होते. त्यादृष्टीने संबंधित मंडळांसोबत झालेल्या बैठकांमध्ये सूचनाही देण्यात आल्या होत्या. पण ढोल ताशा पथकांमध्ये मोठ्या प्रमाणात अंतर पडल्याने मिरवणुकांना विलंब झाला. पण आज सकाळपासूनच आम्ही अधिकाधिक मंडळे पुढे आणण्यासाठी प्रयत्न करत आहोत." असेही गुप्ता म्हणाले.

आज सकाळी श्रीमंत दगडूशेठ हलवाई गणपती मंडळ सकाळी ९ वाजता अलका चौकात आले. तर अखिल मंडई मंडळ १० वाजता अलका चौकात पोहचले. दरवर्षी या मंडळांचे सकाळी सातच्या आत विसर्जन होते. पण एकूण परिस्थिती पाहता पोलिसांचे मिरवणूक मंडळावर नियंंत्रण नव्हते असेच लक्षात येत.

शुक्रवारी सकाळी 10 वाजल्यापासून शहरातील गणेश विसर्जन मिरवणुकीला सुरुवात झाली. मानाच्या गणपती मंडळांच्या पुढे असलेल्या ढोल-ताशा पथकांमुळे या मंडळांनी प्रचंड प्रमाणात वेळखाऊपणा केला. त्यामुळे मानाच्या पाचवा केसरी वाड्यातील गणपतीचे विसर्जन शुक्रवारी रात्री 9.30 वाजता झाले. त्यानंतर शनिवारी सकाळी सात वाजले तरी प्रमुख मंडळे मुख्य विसर्जन मार्गावर पोहचली नव्हती. गणपतींच्या रथासमोर असलेली ढोल-ताशा पथके, डिजे इत्यांदीमुळे विसर्जन मिरवणुकांना उशीर होण्यास कारणीभूत ठरले.